Halyk qory «Bolashaq oıyndary – 2026» aıasyndaǵy fıdjıtal-basketbol jarysyn qoldaıdy
ASTANA. KAZINFORM – Halyk qaıyrymdylyq qory Astanada ótetin «Bolashaq oıyndary – 2026» halyqaralyq mýltısporttyq týrnıri aıasyndaǵy fıdjıtal-basketbol jarysyn qoldaıdy. Týrnırdiń resmı baǵdarlamasynda bul baǵyt Phygital Basketball presented by Halyk Fund ataýymen usynylǵan.
Fıdjıtal-basketbol básekeleri 29 shilde men 3 tamyz aralyǵynda «Qazaqstan» jeńil atletıka sport kesheninde ótedi. Jarysqa 16 komanda qatysady. Qazaqstan atynan GTB KZ jáne PBC Astana óner kórsetedi. Olardyń qarsylastarynyń qatarynda Boca Juniors pen Valencia Basket sekildi halyqaralyq klýbtar bar.
Fıdjıtal-basketbol tsıfrlyq jáne dástúrli sportty bir jarys aıasynda toǵystyrady. Ár match tsıfrlyq kezeńnen jáne naqty alańdaǵy fızıkalyq kezeńnen turady. Komandalar aldymen basketbol sımýlıatorynda 2×2 formatynda oınap, keıin básekeni naqty alańda 2×2 formatynda jalǵastyrady. Qorytyndy nátıje eki kezeńde jınalǵan upaılardyń qosyndysy boıynsha anyqtalady.
Bul bastama T.Qulybaevtyń Halyk qorynyń Qazaqstandaǵy kıbersportty júıeli túrde qoldaý jumysynyń jalǵasy. 2025 jyly qor Almaty Cyber Games Media & Cup jáne Almaty Cyber Games International týrnırleriniń bas seriktesi retinde qoldaý kórsetti. 2026 jyly NNEF qoǵamdyq qorymen birlesip Qazaqstan Cyber Games Students League stýdenttik lıgasyn uıymdastyrdy.
Lıganyń irikteý kezeńine elimizdiń 100 joǵary oqý ornynan 1 500-den astam stýdent qatysty. Jastar men stýdentterge arnalǵan jobalar quramyna MÝIT (IITU), Astana IT University, QBTÝ, UIB jáne Energo University kiretin University Alliance of Science and Technology alıansymen seriktestikte júzege asyrylady. Qor kıbersporttyq jobalardy qarjylandyryp, seriktestermen birge olardyń kásibı deńgeıde ótkizilýine atsalysady.
«Fıdjıtal-basketboldyń ereksheligi – tsıfrlyq sheberlik pen naqty sporttyq daıyndyqty bir jarys aıasynda ushtastyrýynda. Munda tehnologııa sporttyń ornyn baspaıdy, kerisinshe ony tolyqtyrady. Qazaqstandyq komandalardyń óz alańynda halyqaralyq klýbtarmen básekege túsýi otandyq sportta jańa formattardyń damýyna serpin beredi», – dedi Halyk qaıyrymdylyq qorynyń bas dırektory Saǵynbek Shúńkeev.
«Bolashaq oıyndary – 2026» týrnıri Astanada 29 shilde men 9 tamyz aralyǵynda ótedi. 50-den astam elden kelgen 800-den astam qatysýshy segiz baǵyt boıynsha baq synaıdy. Týrnır dástúrli sport, kıbersport jáne zamanaýı tehnologııalardy bir alańda toǵystyrady.
Aıta keteıik, Halyk qaıyrymdylyq qory 2016 jyly qurylǵan. Qor bilim berý, densaýlyq saqtaý, áleýmettik qorǵaý, sport, mádenıet, ekologııa jáne ınfraqurylym baǵyttaryndaǵy áleýmettik mańyzy bar bastamalardy júıeli túrde qoldaıdy. Qurylǵan kúnnen beri qor 214-ten astam jobany júzege asyrdy jáne 90,4 mlrd teńgeden astam qaıyrymdylyq kómek kórsetti.
