Halyk qory balalardy tól merekesimen quttyqtady
ASTANA. KAZINFORM — Tımýr Qulybaevtyń Halyk qaıyrymdylyq qory Balalardy qorǵaý kúnine oraı bıyl da jyldar boıy qalyptasqan dástúrli qaıyrymdylyq bastamalaryn jalǵastyryp otyr.
Qordyń bastamasymen bilim, mádenıet, áleýmettik qoldaý, sport baǵyttarynda júıeli túrde júzege asyp kele jatqan jobalar myńdaǵan balaǵa senim men jylýlyq syılap keledi. Ásirese erekshe kútimdi qajet etetin, áleýmettik osal toptaǵy, aýyr dıagnozy bar balalardy qoldaý — qor qyzmetiniń aınymas baǵyty.
Qordyń Bas dırektory S. Shúńkeev atap ótkendeı, Balalardy qorǵaý kúni — qor jyl saıyn arnaıy daıyndalatyn eń mańyzdy kúnderdiń biri.
— Bul — tek syılyq taratý emes, bul — kóńil bólý, jan jylýyn sezindirý. Balanyń kúlkisin oıatý — qoǵamdy izgilendirýdiń eń tıimdi joly. Qordyń jyl saıynǵy bastamalary osy ustanymnyń naqty is arqyly jalǵasyp kele jatqanyn kórsetedi. Balalarǵa kórsetilgen árbir nazar — olardyń boıyna jylýlyq syılap qana qoımaı, qoǵamnyń da izgilene túsýine jol ashady, — deıdi ol.
Qonaevtaǵy erekshe balalarǵa — erekshe kóńil
Bıyl qor Almaty oblysy Qonaev qalasyndaǵy «Qonaev qalasynyń kúndizgi bolý ortalyǵy» KMM mekemesine arnaıy bardy. Bul ortalyqta 1,5 men 18 jas aralyǵyndaǵy psıhonevrologııalyq aýrýlary bar, tirek-qımyl qozǵalysy buzylǵan balalar kúndizgi bólimde arnaıy áleýmettik qyzmet alady.
Mereke qarsańynda balalardyń kúndelikti kútimine qajetti jaǵdaıdy jaqsartý maqsatynda ortalyq bıyl Halyk qoryna qoldaý kórsetý jóninde habarlasqan. Qor bul isti nazardan tys qaldyrmaı, keńeıtilgen aýqymda áleýmettik kómek uıymdastyrdy: 60 tárbıelenýshige arnalǵan syılyq jıyntyqtaryn ázirlep, merekelik oıyn-saýyq baǵdarlamasyn ǵana emes, ortalyqtyń balalaryna arnalǵan birqatar qosymsha áleýmettik qoldaý sharalaryn júzege asyrdy.
Bul — qordyń Qonaev ortalyǵymen alǵashqy yntymaqtastyǵy emes: 2025 jyly da dál osyndaı merekelik ıgilik kórsetilip, balǵyndarǵa qýanysh syılanǵan bolatyn.
Qor Qaraǵandydaǵy mektep-ınternatqa zamanaýı quraldy syıǵa tartty
Sondaı-aq Qor Halyk Bank-pen birlesip Qaraǵandy oblysy bilim basqarmasyna qarasty № 2 arnaıy mektep-ınternatynyń akt zalyna arnalǵan ınteraktıvti panel satyp alý úshin qarjy bóldi.
Atalǵan mektep-ınternatta erekshe bilim berý qajettiligi bar 144 bala tárbıelenedi. Jańa ınteraktıvti panel bilim berý, tárbıe berý jáne túzetý-damytý jumystarynyń sapasyn arttyryp, mekteptegi merekelik baǵdarlamalar, kontsertter, baıqaýlar, semınarlar, synyp saǵattary men ata-analar jınalystaryn zamanaýı formatta ótkizýge múmkindik beredi.
Aýylǵa ajar bergen «Altyn besik»
Balalardy qorǵaý kúni qarsańynda Halyk qory óńirlerdegi balalarǵa arnalǵan ıgi bastamalaryn jalǵastyrdy. Sonyń jarqyn dáleli — Kostanaı oblysy, Áýlıekól aýdanynda qordyń qarjysyna boı kótergen erekshe kelbetti «Altyn besik» balabaqshasy. Syrtqy kelbeti «Hogvarts» qamalyna uqsaıtyn bul ǵımarat búginde tek sáýlettik ereksheligimen ǵana emes, aýyldaǵy mádenı, áleýmettik ómirdi túbegeıli ózgertýmen de tanymal. Bala tárbıesine arnalǵan keń, jarqyn, zamanaýı keńistik — qordyń eldi mekenderdegi ınfraqurylymdy jaqsartýǵa qosqan mańyzdy úlesiniń biri.
Halyk qory balabaqshany turǵyzýmen ǵana toqtap qalmaı, jyl saıyn mundaǵy baldyrǵandar men pedagogterge qosymsha qoldaý kórsetýdi dástúrge aınaldyrǵan. Bıyl da mereke qarsańynda qor balabaqshaǵa mektepke daıarlaıtyn oqý-ádistemelik ádebıetter, ártúrli damytýshy kitaptar jáne fýtbol doptaryn tabys etti. Bul syılyqtar balabaqshanyń bilim berý qoryn baıytyp, balalardyń jan-jaqty damýyna jańa múmkindik ashty.
Aıta keteıik, Halyk qaıyrymdylyq qory 2016 jyldan beri elimizde bilim berý, sport, mádenıet, ekologııa jáne ınfraqurylym baǵyttarynda 214-ten astam jobany júzege asyryp, qaıyrymdylyq maqsattarǵa 90,4 mlrd teńgeden astam qarjy bólip keledi.
