Halyq kóp jınalatyn jerlerde terakt jasamaq bolǵandardyń joly kesildi – UQK

ASTANA. QazAqparat – QR Ulttyq qaýipsizdik komıtetiniń ókilderi elimizdegi halyq kóp jınalatyn jerlerde qoldan jasalǵan jarylǵysh zatty qoldana otyryp, terakt jasamaq bolǵandardyń jolyn kesti, dep habarlaıdy QazAqparat.

Bul týraly búgin QR Ulttyq qaýipsizdik komıtetiniń bıylǵy atqarǵan jumystary týraly esep bergen komıtet tóraǵasy Ermek Saǵymbaev málim etti.

Kezdesý barysynda Qasym-Jomart Toqaevqa Ulttyq qaýipsizdik komıtetiniń bólimsheleri birqatar lańkestik qylmystyń, sonyń ishinde qoldan jasalǵan jarylǵysh qurylǵyny qoldaný arqyly halyq kóp jınalatyn oryndardyń birinde jasalmaq bolǵan terrorıstik aktige tosqaýyl qoıylǵany jóninde baıandaldy.

Berilgen málimet boıynsha 19 adam qamaýǵa alyndy. Ermek Saǵymbaev Terrorızmge qarsy ortalyq shtabynyń jumysyn úılestirý kezinde terrorlyq qaterlerge qarsy is-áreket sharalaryn jetildirý úshin jattyǵý jıyndary men daıyndyqtar ótkizilgenin habarlady.

Sonymen qatar shet memleketterdiń arnaýly qyzmetteriniń barlaý áreketterine qarsy is-qımyl operatsııalary júzege asyryldy. Anyqtalǵan birqatar fakti boıynsha sotqa deıingi tergeý amaldary júrgizilip jatyr.

Budan bólek, Memleket basshysyna quqyq qorǵaý organdarymen birlese júrgizgen krımınogendik jaǵdaıdy saýyqtyrý jumystarynyń nátıjesi týraly baıandaldy. Bıylǵy tórt aıda UQK 8 qaýipti uıymdasqan qylmystyq topty quryqtady. Qarý-jaraq pen oq-dári jasaýǵa qatysty 7 jasyryn tseh joıyldy. Zańsyz aınalymnan 268 qarý, 21 granata jáne 30 myńnan astam oq-dári tárkilendi. 16 esirtki laboratorııasynyń, 11 halyqaralyq jáne 17 óńirlik esirtki kanalynyń jumysy toqtatyldy.

Ulttyq qaýipsizdik komıtetiniń tehnıkalyq bólimsheleri 37,9 mıllıonnan astam kıbershabýyldy jáne eldiń mańyzdy ınfraqurylym nysandaryna baǵyttalǵan 1948 DDoS-shabýylǵa toıtarys berdi.