Halyq kommýnısteri Kaspııdiń ekologııalyq máselesin kóterdi

AQTAÝ. QazAqparat - Qazaqstannyń kommýnıstik halyq partııasynyń (QKHP) Mańǵystaý oblysyndaǵy ókilderi Kaspıı teńiziniń soltústik bóligine memlekettik turǵyda keshendi ekologııalyq monıtorıng júrgizýdi usynyp otyr, dep habarlaıdy QazAqparat tilshisi.

Kommýnısterdiń málimetinshe, osyǵan deıin birde-bir keshendi zertteý júrgizilmegendikten, akvatorııadaǵy ekologııalyq máselelerdiń negizgi sebepteri aıqyndalmaǵan. QKHP fılıalynyń músheleri tabıǵat janashyrlarymen jáne úkimettik emes uıym ókilderimen birlesip, qorshaǵan ortanyń lastanýy men onyń sheshý joldaryn talqylady. Kaspııge munaıdyń tógilýi, qoqysqa tolýy jáne zańsyz balyq aýlaý derekteriniń kóbeıýi teńizdiń lastanýyna ákep tireýde.

Partııa músheleri atap ótken aımaqtaǵy ózekti ekologııalyq máseleniń taǵy biri – Aqtaýdan 5-6 shaqyrym jerdegi «Qoshqar ata» qaldyqtar qoımasy. Qazirgi tańda kóldiń betine 30 jyl boıy úzdiksiz tógilgen ýly zattardyń saldarynan 105 mıllıon tonna qatty qaldyq jınalǵan. Ol aýaǵa tarap, jaqyn mańdaǵy turǵyndar men sonda jaıylatyn maldyń densaýlyǵyna zııan keltirýde.

«Úshinshi másele, bizdiń qalanyń irgesindegi Qoshqar ata kóli, onyń radıatsııalyq sebepteri jáne qazir 1989 jyldan beri toqtap turǵan HGMZ sııaqty zaýyttardyń aǵyndy sýlary kólge túspese de, qazir ekologııalyq problemalary óte úlken qaýip tóndirýde. Jalpy turǵyndarǵa, qorshaǵan ortaǵa qaýpi óte orasan. Osy máselelerdi talqylap, ózimizdiń halyqtyq depýtattar arqyly úkimetke jetkizý negizgi maqsatymyz», - dedi Qazaqstan kommýnıstik halyq partııasy Mańǵystaý oblystyq fılıalynyń 1-shi hatshysy Roza Mahambetova.