«Halyq qaharmany» ataǵyn berý arqyly QR Tuńǵysh Prezıdenti-Elbasy N. Nazarbaevtyń Otanyna sińirgen orasan eńbegi zań júzinde tanylady - Q. Mámı
ASTANA. 1 jeltoqsan. QazAqparat /Qanat Mámetqazyuly/ - «Halyq qaharmany» ataǵyn berý arqyly QR Tuńǵysh Prezıdenti-Elbasy N. Nazarbaevtyń Otanyna sińirgen orasan eńbegi zań júzinde tanylady.
Búgin QR Parlamenti Senatynyń jalpy otyrysynda QR Tuńǵysh Prezıdenti-Elbasyna «Halyq qaharmany» ataǵyn berýdi qamtamasyz etetin zań týraly pikirin bildirgen Senat Tóraǵasy Qaırat Mámı osylaı málim etti.
«Zań jobalarynyń negizgi maqsaty Táýelsizdiktiń negizin qalap, derbes memleketimizdi nyǵaıtýdaǵy Elbasynyń aıryqsha róline nazar aýdarý, buǵan Parlament tarapynan ádil baǵa berý bolyp tabylady. Zamanymyzdyń asa kórnekti reformatory, óńirlik, jahandyq tyń bastamalar men batyl sheshimderdiń uıytqysy, búkil álem moıyndaǵan bıik bedeldi saıasatker retinde Nursultan Ábishuly eń joǵary memlekettik nagrada - «Halyq qaharmany» ataǵyna laıyq ekendigi burynnan belgili aqıqat. Bul baǵytta talaı bastamalar kóterilgen bolatyn. Biraq Nursultan Ábishuly ózine tán qarapaıymdylyqpen osyndaı usynystardan ylǵı bas tartyp keledi. Al búgingi nagradanyń ereksheligi - bul Prezıdenttiń jeke basyna ǵana emes, Qazaqstannyń Tuńǵysh Prezıdenti-Elbasy mártebesine tán bolyp otyrǵandyǵynda», - dedi Qaırat Mámı.
Senat Tóraǵasynyń aıtýynsha, zańdarǵa engizilgen tolyqtyrýlar arqyly QR Tuńǵysh Prezıdenti-Elbasy N. Nazarbaevtyń Otanyna sińirgen orasan eńbegi zań júzinde tanylady. «Buny Qazaqstan halqy tolyq qoldaıdy dep men kámil senemin jáne muny Senat depýtattarynyń ortaq pikiri dep sanaımyn. Budan buryn da Senat osyndaı oıdy bildirgen bolatyn», - dedi palata spıkeri.
