Halyq eń kóp shaǵymdanatyn qyzmet túrleri belgili boldy
NUR-SULTAN. QazAqparat – Tutynýshylardyń 45,9%-ynyń medıtsınalyq qyzmetterdiń sapasyna kóńili tolmaıdy. Bul týraly Tutynýshylardyń quqyqtaryn qorǵaý komıtetiniń baspasóz qyzmeti málim etti, dep habarlaıdy QazAqparat tilshisi.
Komıtet mamandary tutynýshylar arasynda kórsetiletin qyzmetterdiń sapasy boıynsha júrgizilgen áleýmettik saýalnamanyń qorytyndylaryn jarııalady. 2020 jylǵy shilde men qazan aralyǵynda júrgen saýalnama saýda men qyzmettiń 20 salasyn qamtyǵan.
Jaýap bergenderdiń 67% paıyzy tutynýshylardyń quqyǵy salystyrmaly túrde qorǵalady degen baǵa bergen.
Al áleýmettik saladaǵy qyzmet túrleriniń sapasyna shaǵym aıtýshylar kóp.
«Bul tizimde medıtsınalyq qyzmetter «kósh bastap» tur. Tutynýshylardyń 45,9%-y kórsetiletin qyzmetterdiń sapasyna qanaǵattanbaıdy. Suraqtarǵa jaýap bergen tutynýshylardyń 43,2%-y temirjol kóliginiń qyzmetterine qanaǵattanbaǵan. Qalaaralyq nemese halyqaralyq avtomobıl kóliginiń, onyń ishinde taksıdiń qyzmetterine tutynýshylardyń 42%y qanaǵattanbaǵan. Bilim berý ortalyqtarynyń qyzmetterine suralǵan tutynýshylardyń 41,6% qanaǵattanbaǵan. Sapasy synǵa ushyraıtyn qyzmetterdiń bestigin baılanys qyzmeti túıindep tur. Saýalnamaǵa qatysqan tutynýshylardyń 35,9%-y baılanys sapasy talapqa saı emes degen pikir bildirgen», - dep jazylǵan komıtettiń resmı málimetinde.
