Halyq depozıtteriniń dollarlandyrylýy 29,7 paıyzǵa tómendedi

ASTANA. QazAqparat – Ótken jyldyń jeltoqsanynda qabyldanǵan is-sharalardyń nátıjesinde halyq depozıtteriniń dollarlandyrylýy 29,7 paıyzǵa azaıdy. Bul týraly Májilistiń taratylǵan 7-shaqyrylym depýtattarynyń saýalyna Premer-Mınıstr Álıhan Smaıylovtyń jaýabynda aıtylǵan, dep habarlaıdy QazAqparat tilshisi.

Úkimet basshysynyń atap ótýinshe, Ulttyq banktiń paıyzdyq saıasaty halyqtyq jınaqtaý tálimin, teńgelik aktıvterdiń tartymdylyǵyn arttyrýǵa baǵyttalǵan. Bul ınflıatsııany turaqtandyrý maqsatynda qol jetkizýge septigin tıgizedi. Sonymen qatar teńge salymdaryn qorǵaý baǵdarlamasy júzege asyrylyp jatyr. Ol jeke tulǵalardyń teńge depozıtterine ótemaqy aýdarýdy kózdeıdi.

«Bul is-sharalar halyqtyń teńge depozıtteriniń qysqarýyna jol bermeýge, depozıtterdiń dollarlanýyn jáne aıyrbas baǵamyna, ınflıatsııaǵa qysymdy azaıtýǵa septigin tıgizedi. Qabyldanǵan is-sharalardyń nátıjesinde 2022 jyldyń jeltoqsanynda halyqtyń depozıtteriniń dollarlanýy 29,7 paıyzǵa deıin tómendedi. Bul 2007 jyldyń shildesinen bergi eń tómengi kórsetkish sanalady», - dedi Álıhan Smaıylov.

Munan bólek, Premer-Mınıstrdiń aıtýynsha, Ulttyq bank 2023 jyly zeınetaqy aktıvterin sapaly ınvestıtsııalaý maqsatynda mynadaı baǵyttar usynyp otyr:

1) Qazaqstannyń memlekettik qundy qaǵazdaryn satyp alý;

2) Zeınetaqy aktıvteri qorjynyn ártaraptandyrý maqsatynda shetel valıýtasyn satyp alý jáne shetel valıýtasyndaǵy qarjylyq quraldardy ınvestıtsııalaý;

3) Halyqaralyq qarjy ınstıtýttarynyń jáne teńgedegi sheteldik emıtentterdiń qundy qaǵazdaryn satyp alý;

4) Kvazımemlekettik sektordaǵy sýbektlerdiń qundy qaǵazdaryn satyp alý;

5) Ekinshi deńgeıli bankterdiń qarjy quraldaryn satyp alý;

6) Korporatıvti qazaqstandyq emıtentterdiń qundy qaǵazdaryn satyp alý.

«Atalǵan uynystardy taıaý ýaqytta Ulttyq qody basqarý jónindegi keńeste qarastyrý josparlanyp otyr», - dedi Úkimet basshysy.