«Halyq densaýlyǵy týraly» kodeks jobasyna 800-ge jýyq usynys tústi
Jıynǵa Densaýlyq saqtaý mınıstri Eljan Birtanov, Almaty ákiminiń orynbasary Erjan Babaqumarov, QR Parlamenti Májilisiniń depýtaty Záýresh Amanjolova, QR Balalar quqyǵyn qorǵaý jónindegi ýákil Arýjan Saın, úkimettik emes sektordyń, kásipodaqtardyń, medıtsınalyq uıymdardyń músheleri, densaýlyq saqtaý salasyndaǵy sarapshylar, qoǵam belsendileri jáne buqaralyq aqparat quraldarynyń ókilderi qatysty.
Almaty qalasy ákiminiń orynbasary Erjan Babaqumarov memleket densaýlyq saqtaý salasyna erekshe nazar aýdaryp otyrǵanyn atap ótti.
Al spıkerler qazir qoǵamda qyzý talqylanyp jatqan jańa kodekske engizilgen ózgerister týraly baıandama jasady.
«Búgin memleketimizdiń ár azamaty úshin asa mańyzdy qujatty talqylaýǵa jınalyp otyrsyzdar. Bul óte mańyzdy, qajetti qujat. Osy baǵytta bizde Májiliste arnaıy jumys toby quryldy, 24 otyrys ótkizdik. Búgingi kúnge deıin 791 usynys berildi. Onyń 600-ge jýyǵy qabyldandy, 200-ge jýyǵy jumys ústinde. Munyń barlyǵy bul zańnyń ózektiligin kórsetse kerek. Bizdiń depýtattar óńirlerge de shyǵyp, pikir jınady, olardy usynys retinde aıtty», - dedi QR Parlamenti Májilisiniń depýtaty Záýresh Amanjolova.
Aıta ketý kerek, kodekstiń jańa jobasynda álemdik tájirıbe negizinde DDU usynymdaryna sáıkes ózgerister engizildi.
«Búgingi mańyzdy otyrysqa jınalyp, óte ózekti máselelerdi talqylaýǵa kelgenderińizge qýanyshtymyn. Bul, ár azamatqa qatysy bar quqyqtyq normatıvtik qujat. Kodekstiń jobasy alǵash ret Densaýlyq saqtaý mınıstrliginiń saıtynda bir jyl buryn jarııalandy. Osymen onynshy qoǵamdyq tyńdaý ótýde. Búginde úsh myńnan astam túzetý men usynys jınadyq. Ásirese, halyqtyń pikirine súıenip kodekske túzetýler engizýge kómektesken QR Parlamenti Májilisi janyndaǵy jumys tobyna, ÚEU-larǵa alǵys aıtqym keledi», - dedi Densaýlyq saqtaý mınıstri Eljan Birtanov.
Jıyn barysynda ekpe alý, medıtsınalyq kómektiń qoljetimdiligi men sapasyn arttyrý, jastardyń jynystyq saýatyn arttyrý, medıtsınalyq qyzmetterdiń sapasyna baqylaýdy kúsheıtý, medıtsınalyq kadrlardy daıarlaý sapasyn arttyrý, medıtsınalyq pýnkterdi damytý, densaýlyq saqtaýdy tsıfrlandyrý máseleleri kóterildi.