Halyq belsendi daýys berip jatyr – TMD baıqaýshysy

NUR-SULTAN. QazAqparat – TMD Parlamentaralyq assambleıasynyń baıqaýshysy, Federatsııalyq keńestiń konstıtýtsııalyq zańnama jáne memlekettik qurylys jónindegi komıtetiniń múshesi Oleg Tsepkın Qazaqstanda ótip jatqan saılaýǵa baǵa berdi, dep habarlaıdy QazAqparat tilshisi.

«Ázirge biz áriptesterimizben bir ǵana Nur-Sultan qalasynda 23 ýchaskege bardyq. Munda biz saılaý ýchaskeleri ornalasqan túrli sanattar men ǵımarattardy qamtýǵa tyrystyq. Aıta keteıik, olardyń barlyǵy derlik turǵyn alaptarynda, halyq tyǵyz qonystanǵan aýmaqtarda ornalasqan», - dedi Oleg Tsepkın Sputnik-Qazaqstan mýltımedıalyq baspasóz ortalyǵynda ótken onlaın brıfıngte.

Sonymen birge, O. Tsepkın búgingi saılaýdan alǵan áseri týraly aıtty.

«Saılaý ýchaskeleri ashylmaı turyp-aq, saǵat 6:30-6:45-te alǵashqy saılaýshylardyń daýys berýdi kútip turǵanyn jaqsy dástúr dep sanaımyn. Búgin de halyq arasynda osyndaı dástúr baıqalady. Jalpy búgin halyqtyń belsendiligi óte joǵary. Biz saǵat saıyn 7:00-de, 8:00-de jáne 9:00-de túrli ýchaskelerge baryp, kelýshilerdiń aıtarlyqtaı artqanyn kórdik. Biz saılaý komıssııalarynyń tóraǵalarymen, múshelerimen sóılestik, olar halyqtyń belsendiligi jetkilikti deńgeıde ekenin aıtty. Jalpy atmosfera qolaıly, jaqsy, tipti pozıtıvti deýge bolady. Barlyq ýchaskelerde saılaýshylardy tirkeý tártibi naqty jolǵa qoıylǵan», - deıdi O. Tsepkın.

QR Ortalyq saılaý komıssııasynyń habarlaýynsha, saǵat 16:00-de saılaýshylardyń 52,5 paıyzy daýys bergen.