«Halyq barysy» jeńimpazyna 9 mln teńge beriledi
ALMATY. QazAqparat - Almatyda «Suńqar» halyqaralyq tramplınder kesheninde ótetin beldesýden II «Halyq barysy» respýblıkalyq týrnıri týraly baspasóz máslıhaty ótti, dep habarlaıdy QazAqparat tilshisi.
Almatyda 25-26 mamyrda qazaq kúresiniń bir túri - beldesýden respýblıkalyq týrnıri ótedi. Bıyl 20 mln júlde qory úshin kúresýge Qazaqstannyń barlyq óńirinen 1000-ǵa jýyq balýan qatyspaq.
Ekinshi ret ótkeli otyrǵan týrnır «Rýhanı jańǵyrý» maqalasyn iske asyrý maqsatynda umyt qalǵan kóne «beldesý» sport túrin qaıta jańǵyrtý, ulttyq sportty nasıhattaý, sporttyq salt-dástúrdi saqtaý maqsatynda uıymdastyrylady.
«2018 jyly QR Mádenıet jáne sport mınıstrliginde beldesý ulttyq sport túri retinde tanyldy. Byltyr birinshi týrnırde kórermenderimiz az bolǵandyqtan, olardyń sany tıisti dárejege jetedi degen maqsatpen kórermender arasynda avtokólik oınatylýy - bıylǵy týrnırdiń basty ereksheligi. Sondaı-aq, jattyqtyrýshylarǵa arnaıy syıaqy taǵaıyndalyp otyr. Jarysqa 18 ben 50 jas aralyǵyndaǵy salmaǵy 70 keliden asatyn Qazaqstannyń azamaty qatysa alady», - dedi QR Qazaq kúresi federatsııasynyń bas hatshysy Baqdáýlet Sábıtov.
Jarys Qazaq kúresi federatsııasy bekitken erejelerge sáıkes jáne olımpıadalyq júıe boıynsha ótkiziledi.
«Qazaqstan barysy» qazaq kúresin damytý qorynyń atqarýshy dırektory Janarbek Atyǵaev málimdegendeı, jeńimpaz 9 mln teńge, jattyqtyrýshy 1 mln teńge syıaqy almaq. II oryn ıegeri 4,5 mln teńge, jattyqtyrýshy 500 myń teńge, al III oryn ıegeri 2,7 mln teńge, jattyqtyrýshy 300 myń teńge kóleminde syıaqy alady.
«Bizdiń maqsatymyz - ulttyq sportty álemge tanytý. 126 mln halqy bar Japonııanyń 30%-y dzıýdomen aınalyssa, 56 mln halqy bar Koreıanyń 15% taekvondomen aınalysady. Al, beldesý men qazaq kúresimen aınalysatyndardyń sany 5%-ǵa da jetpeıtini ókinishti. Sol sebepti, ulttyq sport túrlerin 2021 jylǵa deıin mektep baǵdarlamasyna qosyp, álemge damytýdy maqsat etip otyrmyz», - dedi tuńǵysh «Halyq barysy» Maqsat Qıqymov.
Halyq arasynan shyǵatyn «Barysty» anyqtaý sharasyn QR Mádenıet jáne sport mınıstrligi, QR Qazaq kúresi federatsııasy jáne «Qazaqstan barysy» qazaq kúresin damytý qory Almaty qalasy ákimdiginiń qoldaýymen uıymdastyrýda.
