«Halyq barysy» beldesý týrnırine kez kelgen azamat qatysa alady
ASTANA. QazAqparat - «Halyq barysy» respýblıkalyq týrnırine kez kelgen azamat qatysa alady. Bul týraly búgin Ortalyq kommýnıkatsııalar qyzmetindegi baspasóz máslıhatynda «Qazaqstan barysy» qazaq kúresin damytý qorynyń tóraǵasy Arman Shoraev aıtty, dep habarlaıdy QazAqparat.
«Jalpy beldesýdiń qazaq kúresinen aıyrmashylyǵy kóp dep aıta alamyn. Óıtkeni ata-babalarymyz, Qajymuqan, Balýan sholaq babalarymyz kezinde kúreske keń shalbarmen, beldikpen shyǵatyn bolǵan. Soltústikte ótse aıaqtaryna etik kıgen. Biz dál sol kúres túrin jańǵyrtyp, dál sondaı kıimdermen shyǵaratyn bolamyz», - dedi ol.
Arman Shoraevtyń aıtýynsha, «Halyq barysy» týrnırine kez kelgen adam qatysa alady. Biraq kásibı sportshylar jarysqa jiberilmeıdi.
«Qazaqstan barysy», «Eýrazııa barysy» syndy jobalarymyzǵa aldyn ala irikteý ótkizsek, munda taza dala demokratııasy bolady. Kez kelgen Qazaqstannyń kámeletke tolǵan 18-den 50 jasqa deıingi azamattary qatysa alady. 7 mamyrǵa deıin Almatyǵa kelip, tirkeýden ótýi kerek. Bizdiń boljaýymyzsha, 1-2 myń palýan jınalady. 8 mamyr kúni tańerteń bastalyp, kúni boıy ótedi. Bir kún jetpese, erteńinde ary qaraı jalǵastyramyz. Jeńgen adam «Halyq barysy» degen ataqqa ıe bolady. Odan bólek qomaqty qarajatty qaltasyna basady. Shamamen 20 mln teńgedeı», - dedi Arman Shoraev.
Sonymen beldesý sportshylary balaǵy tobyqqa deıin jetetin qońyr tústi shalbar men kók jáne qyzyl tústi jalpaqtyǵy 8 sm quraıtyn jumsaq matadan arnaıy belbeý taǵady. Keýdesi belýarǵa deıin jalańash bolady. Kúres kók shóptiń ústinde ótedi. Beldesýde aýyrtý, tunshyqtyrý syndy ádister qoldanylmaıdy. Palýandarǵa 5 mınýt ýaqyt beriledi. Osy ýaqytta jeńimpaz anyqtalmasa, 3 mınýt ýaqyt qosylady. Al qosymsha ýaqytta da palýandar teń tússe, onda salmaǵy jeńil palýan jeńiske jetedi.
