Halyk Bank Mır kartalaryna qyzmet kórsetýdi toqtatty

ASTANA. KAZINFORM – Qazaqstannyń Halyq banki «Mır» tólem júıesiniń kartalaryna qyzmet kórsetýdi toqtatty.

«Iá, bank endi MIR kartalaryn qabyldamaıdy. Barlyq operatsııalar toqtatyldy», — dep habarlady banktiń baılanys ortalyǵy.

Berilgen aqparatqa sáıkes, sońǵy ózgeris 27 aqpanda bolǵan. Bul bankomattarǵa da, POS termınaldarǵa da qatysty. Qazirgi shekteýlerdiń sebepteri aıtylmady.

Buǵan deıin BAQ Reseıdiń Ulttyq tólem kartochkalary júıesine (UTKJ) 30 naýryzdan bastap Armenııalyq Card (ArCa) tólem júıesine qatysýshy bankter Mır kartalaryna qyzmet kórsetýdi toqtatatyny týraly resmı habarlaǵanyn jazǵan.

«AQSh sanktsııalaryna baılanysty Qyrǵyzstanda Mır bank kartalaryna da qyzmet kórsetilmeıdi», dep jazady BBC News bul týraly.

5 sáýirden bastap Qyrǵyzstannyń tólem júıesi oǵan qatysýshy bankter jelisinde Mir kartalaryna qyzmet kórsetýdi toqtatady. Sheshim «Mır» kartalarynyń operatory — Reseıdiń Ulttyq tólem kartalary júıesine (UTJJ) AQSh-tyń sanktsııalaryna baılanysty qabyldandy, dep habarlady Qyrǵyzstannyń Elkart ulttyq tólem júıesiniń operatory.