Halyq banki Kazkomdy neden qutqardy
Onyń ishinde bankte oryn alǵan bıylǵy basty oqıǵa - Kazkommertsbankti satyp alý boıynsha mámileniń aıaqtalǵany týraly da tilge tıek etildi.
«Halyq banki» AQ basqarma tóraıymy Úmit Shaıahmetova eger «Kazkommertsbankti» Halyq banki satyp almaǵan jaǵdaıda memlekettiń qandaı shyǵynǵa batatyndyǵyn aıtty.
«2015 jyly-aq «Kazkommertsbanktiń» kapıtaly shyǵynda bolatyn. 2016 jyly Keńes Raqyshev Ulttyq bankke júgindi.
Ulttyq bank 400 mlrd teńge kóleminde turaqtandyrý qaryzyn berdi. Sonda da bankte keri aqsha aǵymy qalyptasty. Sondyqtan, sol kezdegi basqarma tóraǵasy Keńes Raqyshev bankti satyp alyp saýyqtyratyn ınvestor izdeýdi usyndy. Memleket aldynda «Kazkomdy» qutqarýdyń 3 stsenarııi qalyptasty. Bankrot bolý, memleket menshigine ótý, strategııalyq ınvestor taýyp saýyqtandyrý», - dedi ol.
Úmit Shaıahmetovanyń aıtýynsha, aldyńǵy eki stsenarıı memleket úshin óte qymbatqa túsetin edi.
«Qazir memleket bankti saýyqtyrýǵa 2,4 trln bóldi dedik qoı. Eger memleket menshigine ótken jaǵdaıda bul shyǵyn 2,4 trln-nan asyp keter edi. Sebebi, 2017 jyldyń 1 qańtarynda jeke tulǵalardyń 1,5 trln kólemindegi depozıti, ulttyq kompanııalardyń 1,5 trln teńge kólemindegi depozıti bar edi. Onyń ústine Ulttyq banktiń salǵan 400 mlrd teńgesi bar. Sonymen qatar, BJZQ 400 mlrd teńge kóleminde ınvestıtsııasy bar edi. Jalpy alǵanda syrtqy qaryz somasy 2 mlrd dollardan asty. Osy passıv qaryzdyń bári memlekettiń ıyǵyna túsetin edi. Osy qaryzdyń barlyǵyn memleket tóleýge tıis bolatyn edi. Osy masshtabty túsinip baryp, úshinshi nusqa qabyldandy», - dedi Úmit Shaıahmetova.
Bank basqarmasy tóraıymynyń aıtýynsha, qazirgi tańda QR Ulttyq banki «Kazkommertsbank» AQ saýyqtyrýdyń arnaıy strategııasyn jasap jatyr.
«2,4 trln teńgege BTA bankiniń problemalyq nesıeleri satylyp alyndy. Bul qarjynyń 1 trln teńgesin Kazkom bıýdjetke qaıtardy. 800 mlrd teńgesin Ulttyq banktiń turaqtandyrý qoryna jiberdi. Onyń 200 mlrd teńgesi repo-operatsııalarǵa baǵyttaldy. Kazkomnyń ózinde qazir 500 mlrd teńge kóleminde lıkvıdtilik qaldy.
Barlyq kredıtorlar saqtaldy. Kelisimdik qatynastar áli kúshinde. Bul jerde eń basty shyǵynǵa batqandar banktiń aktsıonerleri edi. Olar 500 mlrd teńge kóleminde kapıtalyn joǵaltty. Ózderińiz bilesizder, Halyq banki Kazkom aktsııasyn 1 teńgeden tómen baǵada satyp aldy», - dedi ol.
«Halyq banki» AQ «Kazkommertsbank» AQ-yna 185 mlrd teńge kóleminde ınvestıtsııa saldy.
