Halyq banki qansha adamnyń tólem kartalary buǵattalǵanyn málimdedi
ASTANA. QazAqparat - Buǵan deıin saıtymyzda jarııalanǵan «Halyk bank» tólem kartalaryn buǵattaýǵa qatysty aqparatqa sáıkes «Qazaqstan halyq banki» AQ qosymsha málimet taratty. Onda yqtımal alaıaqtyq operatsııa jasalýy múmkin degen kúdikpen tek 48 tólem kartasy buǵattalǵany aıtylady.
Elordada ornalasqan bakomattardyń birinde Banktiń qaýipsizdik qyzmeti skımmıng qurylǵysyn tapqan. Osyǵan oraı bank klıentteri qarajatynyń qaýipsizdigin saqtaý úshin sol kúni atalǵan bankomatty paıdalanǵan 48 adamnyń tólem kartalary buǵattaldy.
Bank óz qarajaty esebinen skımmıng qaýpine kezikken paıdalanýshylardyń tólem kartalaryn jańartyp beredi. Qalǵan klıentterdiń kartochkalary skımmıng qaýpi joq bolýyna baılanysty qaıta jańartylmaıdy.
Skımmıng - joǵary tehnologııaly, sol úshin de qaýipti, bankomattarda keńinen taralǵan tólem kartalaryna qatysty alaıaqtyqtyń túri. Alaıaqtar elektrondyq qurylǵyny paıdalanyp, tólem kartalarynyń aqparatyn, jeke kodtaryn urlaıdy.
