Halyk Bank pen «Qazaqstan turǵyn úı kompanııasy» Halyk qosymshasynda obektini tekserý servısin iske qosty
ASTANA. KAZINFORM – 2024 jyldyń maýsym aıynan bastap Halyk bankiniń qosymshasynda «Memlekettik qyzmetter» – «Jyljymaıtyn múlik» bóliminde Qazaqstannyń úlestik qurylysynyń zańdy obektilerin tekserý qyzmeti iske qosyldy.
Endi qurylys kezeńinde turǵyn úı satyp alǵysy keletin azamattar qurylys salýshylarda QTK kepildiginiń nemese úleskerlerdiń qarajatyn tartýǵa ákimdiktiń ruqsatynyń bar-joǵyn teksere alady. Ol úshin qurylys salýshynyń BSN nemese turǵyn úı kesheni ataýyn engizý jetkilikti. Sondaı-aq Halyk qosymshasynan turǵyn úı qurylysyna úlestik qatysý salasyndaǵy zańnamaǵa sáıkes óz aqshasyn qaýipsiz salýǵa bolatyn barlyq turǵyn úı kesheni týraly qajetti aqparattardy ala alasyz. Sonymen qatar aıaqtalǵan nysandar jáne buryn alynǵan ruqsattar men kepildikter týraly aqparat ta ornalastyrylady.
Aıta keteıik, qosymshaǵa aqparat «Qazreestr» biryńǵaı aqparattyq júıesinen kelip túsedi. Onda barlyq zańdy úlestik obektiler men úlestik qatysý týraly sharttar esepke alynady.
«Salynyp jatqan turǵyn úıdi satyp alýdan jáne satý keńselerinde shart jasasýdan buryn azamattarǵa qurylys salýshylarda QTK kepildiginiń ne úleskerlerdiń aqshasyn tartýǵa ruqsattyń bar-joǵyn tekserý mańyzdy. Halyk Bank jáne QTK ázirlegen servıs bul tekserýdi yńǵaıly formatta – Halyk qosymshasy arqyly onlaın júzege asyrýǵa múmkindik berip otyr. Bul sheshimniń salynyp jatqan turǵyn úımen jasalǵan mámileler kezinde táýekelderdi aıtarlyqtaı azaıtatynyna senimdimiz», - dedi «Qazaqstan turǵyn úı kompanııasy» AQ Basqarma tóraǵasy Altaı Kúzdibaev.
Qazirgi kezde «Báıterek» holdınginiń aldynda aýqymdy tsıfrlandyrý, onyń ishinde úlestik turǵyn úı qurylysyn qoldaý salasy boıynsha mindet tur.
«Halyk Bank jáne QTK ázirlegen tsıfrlyq servıs azamattardyń úlestik qurylysqa qaýipsiz qatysýyn qamtamasyz etýdiń taǵy bir quraly bolady. Osy rette ózińizdi jáne jınaqtaryńyzdy qorǵańyz. Tek zańdy úlestik qurylysqa qatysyńyz», - dep atap ótti Báıterek holdıngi Basqarma tóraǵasynyń orynbasary Úsen Ǵalym.
Osylaısha, jańa servıs azamattardyń qarajatyn zańsyz tartatyn qurylys kompanııalarynan turǵyn úı satyp alýdan qorǵaýǵa múmkindik bermek. Sondaı-aq qurylys salýshylar tarapynan úleskerlerdiń quqyqtary men mindettemelerin buzý táýekeli barynsha azaıady.
