Halyk Bank pen Home bank múgedekterdiń atyna zańsyz nesıeler rásimdegen — depýtattyq saýal

ASTANA. KAZINFORM — Májilis depýtaty Aıan Zeınýllın moıyndaryna zańsyz nesıe ilingen múgedekterge arasha túsip, Bas prokýror men Ulttyq bank basshysynyń atyna saýal joldady. 

— Mysaly, Qaraǵandyda 66 jastaǵy zeınetker G. I. Týtýchkına 2001 jyldan beri psıhonevrologııalyq esepte turǵanyna qaramastan, onyń atynda Halyk Bank pen Home bank-te jalpy somasy 5 081 543 teńge bolatyn qaryz bar. Búkil memlekettik platformalarda onyń densaýlyq jaǵdaıy týraly rastaıtyn qujattar bar, — deıdi depýtat.

Onyń sózinshe mundaı mysaldy júzdep keltirýge bolady.

— Mıyna zaqym kelgeni týraly dıagnoz qoıylǵan ІІ toptaǵy múgedek A. V. Grıgoraşenkonyń ETsQ kilti men uıaly telefony joq ekenine qaramastan atyna Halyk Bank-ten 832 990 teńge kredıt rásimdelgen. Múgedektiń 86 jastaǵy anasy quqyq qorǵaý organdary men bankterdiń tabaldyryǵyn tozdyrýǵa májbúr. Mundaı mysaldar júzdep kezdesedi.

Zardap shegýshiler sotqa júgingenimen keıingi 5 jylda Qazaqstan sottarynda alaıaqtyq jolmen rásimdelgen kredıtti zańsyz dep taný týraly talap-aryzdyń bir de bireý qanaǵattandyrylmaǵan, — degen depýtat Bas prokýror men Ulttyq bank basshysynan, Іshki ister mınıstri men Qarjy naryǵyn retteý jáne damytý agenttiginiń basshysynan saýalynda atalǵan tulǵalarǵa jan-jaqty kómek surady.

Eske salsaq, Qarjylyq monıtorıng agenttigi alaıaqtyqtyń jańa túri paıda bolǵanyn málim etken bolatyn.