Halyq ártisi Ánýar Boranbaevtyń 70 jyldyǵy atap ótildi
QOSTANAI. QazAqparat - Amangeldi aýdanynda halyq ártisi Ánýar Boranbaevtyń 70 jyldyǵyna arnalǵan is sharalar ótti, dep habarlaıdy QazAqparat.
Kórnekti ártisti eske alýǵa arnalǵan jıynǵa kelgender Tasty aýylyndaǵy Keıki batyr eskertkishine baryp, baba rýhyna quran baǵyshtady. Odan soń Á.Boranbaev atyndaǵy jalpy bilim beretin orta mektepke kelip, bilim uıasynyń aldyndaǵy eskertkishke gúl shoqtaryn qoıdy.
Tústen keıin B.Qoldasbaev orta mektebiniń májilis zalynda Á.Boranbaevty eske alýǵa arnalǵan «Dalanyń dara sańlaǵy» atty konferentsııa ótti. Konferentsııada Qostanaı oblysy ákimi apparatynyń basshysy Arman Ábenov quttyqtaý sóz sóılep, Qostanaı oblystyq mádenıet basqarmasynyń basshysy Erlan Qalmaqov, M.Áýezov atyndaǵy teatr dırektory, Qazaqstannyń eńbek sińirgen qaıratkeri Ashat Maemirov baıandama jasady. Munan soń esimderi elge tanymal birqatar tulǵalar Á.Boranbaevtyń ómiri men óneri týraly estelikterimen bólisti.
"Kórnekti teatr-kıno akteri, Qazaqstannyń halyq ártisi Ánýar Boranbaev qazaq sahna ónerine ataqty 60-jylǵylardan keıin kelgen tegeýrindi býynnyń kórnekti ókili. Ol otyz jyldyq shyǵarmashylyq ǵumyrynda ulttyq ónerge mol qazyna saldy, urpaqtar jadynan óshpes kórkem beıneler jasady. Ónerge qaltqysyz qyzmet etken Ánýar san qyrly talant ıesi boldy. Ol kıno ónerinde de óz bıiginen kórinip, qaıtalanbs qoltańbasyn qaldyrdy. Onyń kınodaǵy asa sátti debıýti «Gaýhartas» fılmindegi Tastan beınesi ekenin ónersúıer qaýym jaqsy biledi",- deıdi akademık Saılaý Baızaqov.
Konferentsııadan soń M. Áýezov atyndaǵy teatr ártisteri aýdandyq Mádenıet úıinde «Syǵan serenadasy» qoıylymyn usyndy. Odan soń shara qonaqtary aýdandyq murajaıdy aralap, aýdandyq Mádenıet úıinde aýdan ónerpazdarynyń daıyndaǵan kontserttik baǵdarlamasyn tamashalady.
Ánýar Boranbaev 1948 jyldyń 14 naýryzynda Qostanaı oblysy, Amangeldi aýdany, Jańatalap aýylynda dúnıege keldi. Oqýshy kezinen ónerge jaqyn ol 1965 jyly on bir jyldyq orta mektepti bitirgen soń Almatydaǵy Aýyl sharýashylyǵy ınstıtýtynyń stýdenti atanady. Bir jyldan keıin Qurmanǵazy atyndaǵy konservatorııanyń akterlik bólimine túsedi. Talantty jas 3-kýrsta oqyp júrgende M.Áýezov atyndaǵy akademııalyq drama teatryna qyzmetke shaqyrylady. Onyń teatrda oryndaǵan alǵashqy rólderi - M.Áýezovtiń «Túngi sarynyndaǵy» muǵalim Sapa, Sh.Aıtmatovtyń «Ana-Jer-anasyndaǵy» Maısalbek, Q.Muqashevtiń «Dala dastanynydaǵy» aqyn Іlııas Jansúgirov beınesi.
