«Halyq Arena» muz saraıyna qyzyǵýshylyq artyp keledi
ASTANA. QazAqparat - 14-18 jeltoqsan aralyǵynda Almatydaǵy «Halyq Arena» muz saraıynda Qazaqstan Respýblıkasy Táýeldsizdiginiń 25 jyldyǵyna oraılastyrylǵan jasóspirimder arasynda shaıbaly hokkeıden jarys ótti, dep habarlaıdy QazAqparat.
Jarys barysynda Búkilálemdik 28-shi ýnıversıada oıyndaryna arnalyp jańadan salynǵan «Halyq Arena» muz saraıyna qyzyǵýshylyq tanytqandardyń qatary kóp bolǵan. Jattyqtyrýshylar men jas hokkeıshiler turyp jatqan orynnan bastap, muz sapasyna deıin, jarys kezinde usynylǵan barlyq jaǵdaıǵa dán rıza bolǵandaryn aıtyp, joǵary baǵasyn bergen.
«Barys 2001» komandasynyń jattyqtyrýshysy Konstantın Serǵazınov: «Jarys tamasha uıymdastyryldy. Barlyǵy kóńilimizden shyǵyp otyr, aıtar eshbir eskertýimiz joq. Kıim aýystyratyn oryn óte jaıly, tipti balalardyń kıimine sheıin jýylady. Biz jarystarǵa jıi shyǵyp turamyz, biraq qaıda barmasaq ta, mundaı jaǵdaıdy kórgen emespiz. Muzǵa shyǵý ýaqyty kestege sáıkes, bári qatań saqtalady, bul óte yńǵaıly. Bizdiń Astanadaǵy muz saraıymyz da jańa, sondyqtan salystyra alamyz, aıtarymyz - bári joǵary deńgeıde, tek jaqsylap oınasań bolǵany», - dep atap ótti.
Al FISU atynan kelgen baqylaýshy Paýlo Ferreıra (Portýgalııa) jańadan salynǵan «Halyq Arena» sport nysanynyń halyqaralyq standarttarǵa qanshalyqty jaýap beretindigi jóninde óz oıyn bylaı jetkizdi: «Oıyndarǵa deıin men bul nysanǵa kelip kórgen emespin, alaıda ol salynyp bitkennen keıin áriptesterim osynda bolyp qaıtqandyqtan, qaıda bara jatqanymdy bildim. Daıyndyq deńgeıi joǵary, barlyǵy eń joǵarǵy standarttarǵa sáıkes ekendigin endi óz kózimmen kórip otyrmyn. Biz úshin osy testilik jarystarǵa qatysý asa mańyzdy boldy. Biz osylaısha jekelegen aımaqtardyń barlyǵyn jan-jaqty teksere alamyz. Bul tek muz alańyna ǵana qatysty emes, eń bastysy, uıymdastyrý kezinde qajetti barlyq jaǵdaılar eskerilýi tıis. Jurtshylyqqa arnalǵan aımaq qaıda ornalasqan, qalaı uıymdastyrylǵanyn, kıim aýystyratyn oryn men medıa jaıǵasatyn aımaq qaıda, ıaǵnı ne, qaıda, qalaı uıymdastyrylǵanyn bilýimiz kerek boldy. Ýnıversıadaǵa birneshe apta qalǵanda osynda jumys júrgizip otyrǵanymyzdyń ózi óte keremet múmkindik. Osynyń arqasynda biz syrttan baıqaý júrgizip, basty keńesterimizdi berip otyrmyz. Qalaı uıymdastyrǵan durys bolatynyn talqylap, eń durys sheshimdi qabyldaýymyz úshin keıde uıymdastyrýshylar erteń qıyndyq týdyrýy múmkin qandaı da bir aımaqtardy ózderi kórsetip jatady. Uıymdastyrý komıtetiniń qyzmetkerleri olardyń aldynda turǵan búkil mindetterdi ózderi kórip, olardy sheship otyrady. Bul óte mańyzdy, óıtkeni adamdar ózderiniń osal aımaqtaryn kórgen kezde, búkil nazaryn durys sheshim tabýǵa aýdaratyn bolady. Óz isine degen mundaı synshyldyq aýadaı qajet. Bul ońaı emes ekenin, óz aldyńa úlken talap qoıý dep bilemin, biraq qazir bul asa qajet. Qazir jumys jasaý qıyn bolǵan saıyn, erteń Ýnıversıada kezinde soǵurlym jeńil bolmaq»,-dedi.
Jarys 2017 jyly Almaty qalasynda ótkiziletin 28-shi Dúnıejúzilik qysqy ýnıversıada qarsańynda testilik saıystar retinde uıymdastyryldy. Jarysqa Qazaqstannyń túrli aımaqtarynan 6 jasóspirimder komandasy, atap aıtqanda, «Torpedo Óskemen 99-00», «Ertis 1999-2000», «Astana-2000», «Unist (Qaraǵandy)», «Barys 1999» jáne «Barys 2001» komandalary qatysyp, sheberlikterin shyńdady.
Muz saraıy 300 kórermendi syıdyra alatyn kópatqarymdyq ámbebap muz alańynan jáne 300 orynǵa shaqtalǵan shaǵyn alańnan turady. Ýnıversıada kezinde osy muz saraıynda erler arasyndaǵy shaıbaly hokkeıden jarystar ótkizilmek.
