Halyq arasynda shyǵarmashylyq týyndylar boıynsha avtorlyq quqyqty talap etý jaǵdaılary jıilep keledi
ASTANA. 3 qarasha. QazAqparat /Marlan Jıembaı/ - Búginde Qazaqstan halqy ásirese, jastar ózderiniń shyǵarmashylyq jumystaryna degen avtorlyq quqyqty jıi talap ete bastady. Bul týraly búgin BNews.kz portalynda ótken onlaın-konferentsııa barysynda Ádilet mınıstrliginiń Zııatkerlik menshik quqyqtary komıteti tóraǵasynyń orynbasary Sholpan Ábdireeva málim etti.
Onyń aıtýynsha, zııatkerlik menshikti tirkeý jóninde ótinish berýshiler sany kún sanyp artyp keledi. Olardyń arasynda ǵylymı týyndylar men bilim berý úderisinde qoldanylatyn shyǵarmalar bar. Árıne bireý óziniń jan-tánin, boıyndaǵy daryny men qarym-qabiletin salyp, kóz maıyn taýysa otyryp, eńbektenip jatqanda ózge bireýdiń ony kóshirip ala salýy ókinishti jáıt. Elimizde olarmen kúres te júrgiziledi. Naqtyraq aıtqanda ondaı adamdar azamattyq jáne ákimshilik jaýapqa tartylady. «Biraq, meniń paıymdaýymsha, mundaı azamattarǵa aıyppul salyp, qylmystyq is qozǵaǵansha, olardy azamattyq jaýapqa tartqan jón», deıdi Sh.Ábdireeva.
Sondaı-aq ol sózinde ózderiniń quqyqtaryn qorǵaýdy múmkindiginshe azamattyq tártippen júrgizgen jón ekendigin, sonda ǵana aıypty azamattan tıisti kólemde qarjy ónidirip alýǵa bolatyndyǵyn atap kórsetti.
Sh.Ábdireevanyń málimetterine qaraǵanda, 2010 jyldyń 9 aıynda ádilet organdary 660 tekserý sharalaryn júrgizip, 266 ákimshilik is qozǵap, 226 adamdy ákimshilik jaýapqa tartqan. Sondaı-aq taǵy 68 qylmystyq is qozǵalǵan. Bul ótken jyldyń sáıkes merzimimen salystyrǵanda 2 esege kóp bolyp otyr.
