Halyq arasynda oıyn-saýyq ortalyqtaryna senimsizdik paıda boldy - MEGA ortalyqtarynyń basshysy
ASTANA. QazAqparat - MEGA saýda jáne oıyn-saýyq ortalyqtary jelisi formaldy qaýipsizdik talaptaryn saqtaýmen shektelip qalmaı, óz standarttaryn engizedi. Bul týraly Astana Group kompanııalar tobynyń ıesi Nurlan Smaǵulov «MEGA Silk Way» oıyn-saýyq ortalyǵynda ótken jınalysta málimdedi, dep habarlaıdy QazAqparat tilshisi.
Kezdesýde Kemerovo qalasyndaǵy qaıǵyly oqıǵaǵa qatysty MEGA ortalyqtaryndaǵy órt qaýipsizdigi máselesi talqylandy.
«Biz Almaty jáne Astana TJ deparatmentterimen qol qoıý úshin memorandýmdar ázirlep qoıdyq. Óz tarapymyzdan atalǵan memorandýmdarǵa qol qoıyp, TJ deparatmentterine jiberdik. Biraq, TJD - áskerılendirilgen qurylym, olar jaıdan-jaı sheshim qabyldaı salmaıdy, olarǵa ýaqyt kerek. Bul qujatta saýda úılerin jospardan tys tekserýdi jylyna bir ret qana emes, qajet bolsa kez kelgen ýaqytta júrgizýdi usynyp otyrmyz. Bizge bir aı buryn eskertip, daıyndalýǵa ýaqyt berýdiń de qajeti joq. Tekserý naǵyz jospardan tys bolýy kerek, apat aıtyp kelmeıdi. Bul bizdiń bastamamyz. Ony ózge de saýda oryndary men qoǵamdyq oryndar qoldaıdy dep úmittenemin», - dedi Nurlan Smaǵulov.
Sonymen birge, N. Smaǵulov qoǵam belsendileri men blogerlerdiń áleýmettik jelidegi syn-pikirlerine qatysty jaýap berdi.
«Meniń qazirgi mindetim - saýda úılerine qatysty alańdaýshylyqty seıiltý dep esepteımin. Árıne, bul daý da kóp uzamaı basylady. Syn-pikir aıtyp júrgen qoǵam belsendilerimen jáne blogerlermen sóz talastyrǵansha, ádil jumys istep, barlyǵyn ispen kórsetýdi qalaımyn», - dep óz sózin jalǵastyrdy N. Smaǵulov.
Onyń aıtýynsha, bıznes-qaýymdastyq únemi qarsy bolyp kelgen jospardan tys tekserýlerge kelisim berý sheshimi qazir aýadaı qajet. Sebebi, halyq arasynda saýda, oıyn-saýyq ortalyqtaryna degen senimsizdik paıda boldy.
N. Smaǵulov tekserýshiler tarapynan qysymnyń kóbeımeıtinin atap ótti, sebebi qazir bıznes-qaýymdastyq aıtarlyqtaı áleýetti jáne ózin jemqorlyq kórinisterden saqtaı alady.
Jınalys sońynda «MEGA Silk Way» OSO basshylyǵy qoǵam belsendileri men jýrnalısterge ekskýrsııa uıymdastyrdy. Atap aıtqanda, olarǵa ǵımarattyń kez kelgen núktesinen kórsetilgen belgiler arqyly jol tabýǵa bolatynyn kórsetti. «MEGA Silk Way» ǵımaratynda syrtqa shyǵatyn 24 esik bar jáne olardy balalar qınalmaı asha alady.
Sonymen birge, nysan basshysy qaýipsizdik standarttaryna qatysty málimdeme jasady.
«Búgingi kúnge deıin órtke qarsy qyzmettiń, qurylys normalarynyń bar talaptaryn oryndap keldik. Sebebi, quqyqtyq memlekette ómir súrip jatyrmyz. Endi kelýshilerge yńǵaıly bolý úshin barynsha kúsh salamyz, alystan kórinýi úshin nusqaýlyq belgilerin ulǵaıtamyz. Zań talaptarymen shektelip qalmaı, óz standarttarymyzdy engizemiz», - dedi ol.
