Halyq arasynda erekshe tanymal Saǵalbaı Janbaev týraly kitap jaryqqa shyqty
ASTANA. QazAqparat - «Atamura» baspasynda tarıhshy Іlııas Qozybaevtyń «Sol baıaǵy Janbaev» atty kitaby jaryq kórdi.
Bul adamnyń esimin telearnalardan, basylym betterinen kóp kezdestire bermeımiz. Alaıda Saǵalbaı Janbaev (1904-1972) esimi áli de el aýzynda. Ásirese, «Et kerek kezde - Janbaev kerek, astyq kerek kezde - Janbaev kerek, jún kerek bolsa - Janbaev kerek, oqýǵa kelgende Janbaevtyń qajeti joq pa?» («Kogda mıaso nado bylo - Janbaev nado, zerno nado - Janbaev nado, sherst nado - Janbaev nado, ýchıtsıa - Janbaev ne nado?») degen ázil sóz kópshiliktiń esinde.
Oqyǵany kóp bolmasa da qarapaıym halyqtyń muńyn muńdap, joǵyn joqtap ótken, ádil, kishipeıil, qaradan shyqqan daryndy jetekshi týraly sózdiń folklorǵa engenine 70 jyl boldy.
«Atamura» baspasynda jaryqqa shyqqan tarıhshy Іlııas Qozybaevtyń «Sol baıaǵy Janbaev» eńbegi - kóptiń kópten kútken kitaby. Sebebi ol táýelsiz el azamattarynyń dúnıetanymyn qalyptastyrý, óz tarıhyn taný baǵytynda jumys istegen tulǵa.
Kitapta Saǵalbaı Janbaevtyń shynaıy ári jarqyn beınesi somdalǵan. Avtor monografııany jazý úshin Qazaqstan men Reseı muraǵattaryn, basylymdar men ózge de qujattardyń materıaldaryn zerttep, derekter jınaqtaǵan. Onyń ǵylymı stıl janryn saqtaı otyryp, eńbekti túsinikti, qarapaıym tilmen jazyp shyqqanyn atap ótý kerek.
Atalǵan eńbekti oqyp bolǵan soń Aqmola, Soltústik Qazaqstan, Qostanaı, Pavlodar jáne Semeı oblystarynda basshylyq qyzmet atqaryp, halyqtyń alǵysyna bólengen Saǵalbaı Janbaevtyń beınesi kóz aldymyzǵa keledi.
