Halyq aqyly jáne tegin medıtsınalyq kómektiń arajigin bilýi tıis - Baqytjan Saǵyntaev
«Elbasy óz Joldaýynda Úkimetke memleket mindetteriniń shegin belgilep, tegin medıtsınalyq kómektiń kepildik berilgen kóleminiń jańa úlgisin ázirleýdi tapsyrǵan bolatyn. Mınıstr qazir óz baıandamasynda osynyń bárin aıtyp ótti. Negizinen óte mańyzdy ári iske asyrylýy kúrdeli sharýa. Sol sebepten Eljan Amantaıuly, halyq arasynda aqparattyq túsindirý jumysyn júrgizý qajet, - dedi Úkimet basshysy Densaýlyq saqtaý mınıstri Eljan Birtanovqa.
Premer-Mınıstrdiń aıtýynsha, halyq qandaı medıtsınalyq kómekti memleket kepildi túrde tegin beretinin, al qaısysy aqyly bolatynyn anyq bilýi tıis.
«Erteń aýrýhanaǵa ne bolmasa basqa medıtsınalyq mekemege barǵan kezde túsinbeýshilik bolmaýy úshin jergilikti ákimshiliktermen birge túsindirý jumystaryn júrgizý qajet. Negizgi usynylyp otyrǵan tásilderdi suraqtar bolmasa qoldaımyz. Aldaǵy ýaqytta kelisilgen shart boıynsha bekitýge Úkimetke shyǵaryńyzdar»,- dedi Baqytjan Saǵyntaev.
Úkimet otyrysynda "Tegin medıtsınalyq kómektiń kepildi kóleminiń tizimin jetildirý boıynsha sharalar týraly" baıandaǵan Eljan Birtanovtyń aıtýynsha, TMKKK-tiń jańa modelin engizýdi 3 kezeńde júzege asyrý boljamdalady. Birinshi kezekte,qazirgi jaǵdaıda TMKKK-ny barynsha naqtylaý jáne ońtaılandyrý maqsatynda basymdyqty emes medıtsınalyq qyzmetterdi basym etý jáne shekteý arqyly TMKKK paketindegi medıtsınalyq kómektiń tolyq revızııasy júrgiziletin bolady. Ekinshiden, TMKKK -niń jańa modelin MÁMS-ti engizýmen birge óristetiledi.
«Úshinshiden, medıtsınalyq texnologııalardy damytýdy eskere otyryp, TMKKK jáne MÁMS tizimderin únemi jańartyp otyrý kózdeledi», -dedi mınıstr.