Halqymyzǵa qorǵan bolǵan ulttyq áskerimizdiń aıbyny arta bersin - Batalov
Jıynda oblys ákimi Amandyq Batalov jetisýlyqtar men áskerıler qaýymyn merekemen quttyqtady.
"Qurmetti Otan qorǵaýshylar, oblys turǵyndary! Sizderdi 7 Mamyr - Otan qorǵaýshylar kúnimen, Qazaqstannyń Qarýly Kúshteriniń 25 jyldyq merekesimen shyn júrekten quttyqtaımyn! Táýelsizdigimiz ben tutastyǵymyzdy saqtaýǵa tirek bolǵan, halqymyzǵa qorǵan bolǵan ulttyq áskerimizdiń aıbyny arta bersin! Memleket basshysy, Joǵarǵy Bas Qolbasshy Nursultan Ábishuly: «Qasterli Otanymyzǵa qyzmet etý jáne ony qorǵaý - árbir azamattyń qasıetti boryshy. Osynaý perzenttik paryzdy áskerı adamdar adal atqarýǵa tıis! Sonda ǵana biz armanymyzǵa jetip, Máńgilik El bola alamyz», - dep atap kórsetken bolatyn. Bar ǵumyryn Otanyn qorǵaýǵa arnap, qyzmetin minsiz atqaryp júrgen áskerı qyzmetkerlerge alǵys bildiremiz. Elimizdiń tynyshtyǵyn saqtaý jolyndaǵy jaýapty qyzmetterińiz tabysty bolsyn!" - dep oblys ákimi tilegin bildirdi.
Munan soń óńir basshysy Taldyqorǵan áskerı garnızonynyń áskerı qyzmetkerleri Astana qalasynda ótken áskerı sherýge qatysqanyn tilge tıek etip, Otan qorǵaýshy aǵa býynǵa qarata izgi nıetin jetkizdi.
"Uly Jeńis kúniniń qarsańynda soǵys ardagerlerin, tyl eńbekkerlerin jáne osy beıbit kúnge jetý jolynda ólsheýsiz úles qosqan azamattardyń barlyǵyn quttyqtaımyn! Sizderdiń eren erlikterińiz ben batyrlyqtaryńyz árdaıym patrıotızmniń, Otandy súıýdiń, elge minsiz qyzmet etýdiń úlgisi bolyp qala bermek. Barshańyzǵa myqty densaýlyq, beıbit ómir tileımin! Baqytty urpaq ashyq aspan astynda bereke-birlikte ómir súre bersin!" - dedi A. Batalov.
Saltanatty sharada oblys basshysy áskerı qyzmetkerlerge Qurmet gramotalary men Alǵys hattar tapsyrdy.
Əriptesterin quttyqtaǵan Taldyqorǵan áskerı garnızonynyń shtab bastyǵy, podpolkovnık Janat Ermuhanov ta áskerı garnızonnyń áskerılerin marapattady. Saltanatty kesh kontserttik baǵdarlamaǵa jalǵasty.
