Halqymyzdyń tarıhy, etnografııasy men ónerine qatysty 5 myńǵa jýyq buryn belgisiz bolyp kelgen qoljazbalar men merzimdi basylymdar tabylyp, satyp ákelindi
ASTANA. 12 jeltoqsan. QazAqparat. Búgin Memlekettik hatshy Qanat Saýdabaevtyń tóraǵalyǵymen Beıbitshilik jáne kelisim saraıynda «Mádenı mura» baǵdarlamasyn iske asyrý jónindegi Qoǵamdyq keńestiń keńeıtilgen otyrysy ótti, dep habarlaıdy QR Prezıdentiniń baspasóz qyzmeti.
Otyrysqa birqatar mınıstrlikter men vedomstvalardyń basshylary, Qazaqstan Respýblıkasy Parlamenti Senatynyń depýtattary, ǵylym, mádenıet jáne óner salalarynyń belgili qaıratkerleri qatysty.
- Táýelsizdiktiń 20 jyldyǵynyń qarsańynda Memleket basshysynyń segiz jyl burynǵy bastamasymen iske asyryla bastaǵan «Mádenı mura» baǵdarlamasynyń qorytyndy otyrysyn ótkizýimizdiń máni zor dep bilemin. Jahandyq qarjylyq daǵdarystarǵa, memlekettilikti qalyptastyrý jolyndaǵy qıyn-qystaý jyldarǵa qaramastan, halyqtyń rýhanı damýy men tarıhı sanasyn jańǵyrtý isi Elbasynyń udaıy qamqorlyǵy men nazarynda boldy. Sondyqtan Tuńǵysh Prezıdentimiz N.Á. Nazarbaevtyń kóshbasshylyǵymen táýelsiz Qazaqstannyń qol jetkizgen áleýmettik-ekonomıkalyq jáne qoǵamdyq-saıası damýyndaǵy zor tabystarymen qatar halyqtyń mádenı órleýi men rýhanı jańǵyrýyndaǵy jetistikter shyn máninde maqtan tutýǵa laıyq,- dep atap kórsetti Q.Saýdabaev otyrystyń ashylýynda sóılegen sózinde.
2004-2011 jyldary 93 tarıhı jáne mádenı nysandar jóndelip, onyń 73-i tolyq jóndeýden ótkizildi. Osy kezeńde mazmunymen jáne polıgrafııalyq sapasymen erekshelenetin ondaǵan kitap serııalary jaryq kórdi. Mádenı jáne tarıhı eskertkishter aýmaǵynda 37 arheologııalyq qazba jumystary júrgizilip, 33 qoldanbaly ǵylymı zertteýler tabysty aıaqtaldy. Alys jáne jaqyn shetelderdiń muraǵattarynan halqymyzdyń tarıhy, etnografııasy men ónerine qatysty 5 myńǵa jýyq buryn belgisiz bolyp kelgen qoljazbalar men merzimdi basylymdar tabylyp, satyp ákelindi.
Qoǵamdyq keńestiń keńeıtilgen otyrysynyń kún tártibiniń aıasynda arheologııalyq eksponattardan jáne «Mádenı mura» serııasymen jaryq kórgen kitaptardyń úlken kórmesi uıymdastyryldy. «Mádenı mura» jáne «Qazaqstandyq ulttyq elektrondyq kitaphana» ınternet-portaldarynyń tusaýkeseri ótti.
