Halqymyzdyń shejiresin DNQ arqyly ǵylymı túrde dáleldeýge múmkindik týyp otyr - N. Baımuhanov
ALMATY. 2 tamyz. QazAqparat - Qazaq - genealogııalyq jaǵynan baı halyq. Bul týraly «Shejire DNA» DNQ-genealogııalyq ǵylymı ortalyǵynyń dırektory Nurbol Baımuhanov búgin Almatyda ótkizgen baspasóz máslıhatynda aıtty.
«Qazaq halqynda ár tektiń óziniń genealogııalyq etalony bar. Qazir árbir adam óziniń ata-babalarymen tektik baılanysyn 99,9 paıyzǵa deıin dáleldeı alady. Bul genetıka ǵylymynyń arqasynda júzege asyp otyr. Mundaı zertteý bizge shynaıy tarıhymyzdy qalpyna keltirý úshin kerek. Ásirese, muraǵattar únsiz qalǵan kezde DNQ arqyly ony qalpyna keltirýdiń mańyzy óte zor bolyp otyr», - deıdi N. Baımuhanov. Nurbol Bolatulynyń aıtýynsha, qazir halqymyzdyń atadan-balaǵa jalǵasyp kele jatqan shejiresin DNQ arqyly ǵylymı túrde dáleldeýge múmkindik týyp otyr. «Biz bul jobamyzdyń kelesi kezeńinde elimizdiń medıtsınalyq kartasyn jasaýǵa qol jetkizbekpiz. Óıtkeni genealogııalyq zertteý arqyly adamdardyń qandaı aýrýmen aýyrǵanyn anyqtaýǵa bolady. Eger qaı óńirdiń turǵyndarynda qandaı aýrý jıi kezdesetinin anyqtaıtyn bolsaq, onyń halyq densaýlyǵyn saqtaýdaǵy mańyzy óte zor bolmaq. Jalpy arheologııalyq qazba jumystary kezinde tabylǵan súıekterge birinshi zertteýdi bıologtar jasaýy tıis. Óıtkeni arheologııalyq zertteý kezinde ondaǵy keıbir DNQ belgileri búlinip, joıylyp ketý múmkindigi óte joǵary. Ázirge súıekke zertteý júrgizetin arnaıy zerthana Avstralııada ǵana bar», - dep aıtyp ótti Nurbol Bolatuly.
