«Halqym dep ómir súrgen tulǵa edi...»
ASTANA. 27 shilde. QazAqparat - «Keshe 63 jasynda belgili memleket jáne qoǵam qaıratkeri, halqymyzdyń qadirli perzentteriniń biri Sarybaı Sultanuly Qalmyrzaev dúnıeden ozdy.
Elimizdiń ósip-órkendeýi jolynda aıanbaı ter tókken memleket jáne qoǵam qaıratkeri, Táýelsizdikke qol jetken alǵashqy syndarly kúnderden bastap Elbasymyzdyń qasynan tabylǵan senimdi serigi, aıaýly áke, adal jar, el azamaty - Sarybaı Sultanulynyń pánıden baqıǵa ozǵan qazasy barshamyzdyń qabyrǵamyzǵa batady». QR Parlament Senatynyń tóraǵasy Qaırat Mámı óziniń ınternettegi jeke-paraqshasynda Sarybaı Qalmyrzaevtyń qazasyna baılanysty osylaı jazyp, kóńil bildirdi.
«Memlekettik qurylymdy qalyptastyrý, ishki jáne syrtqy saıasattaǵy irgemizdi bekemdeý isine Sarybaı Sultanuly ólsheýsiz úles qosty. Sarybaı Sultanuly baýyrmal, janyndaǵylarǵa sáýlesin shashyp júretin azamattyq qasıeti men kisilik kelbeti erekshe tulǵa edi. Sákeńniń eń erekshe qasıetteriniń biri at jalyn tartyp minip joǵary laýazymdarda júrgende janyna tek qana adamgershiligi mol, isker azamattardy toptastyra bildi. Kadr daıarlaý isinde eshqashan rýshyldyqqa, júzge bólýge, jershildikke urynǵan joq. Sondyqtan da artynda el ıgiligine jarar izgi isteri, isin jalǵastyrar urpaǵy men shákirtteri qaldy. Kóńilge medeý bolatyny osy», - dep jazady spıker Qaırat Mámı.
«Sarybaı Sultanuly búkil ǵumyryn el ıgiligine, memleketimizdiń yrys-dáýletin arttyrýǵa, elimizdiń eńsesi bıik, táýelsizdigi baıandy bolýyna arnady. Ol elimizdiń bas shańyraǵy - Aqordamyzdyń abyroıynyń asqaqtap, mártebesiniń bıikteýine aqyl-parasatymen jáne mol tájirıbesimen ólsheýsiz úles qosqan bıik rýhty tulǵa edi. Sarybaı Sultanulynyń jarqyn beınesi júregimizde máńgi saqtalatyn bolady. Marqumnyń jany jánnata bolyp, peıishte nury shalqysyn», - dep jazady Senat Tóraǵasy.
