Halqy zańyn syılaıtyn, sotyna senetin qoǵam - eń damyǵan, eń turaqty qoǵam - N. Nazarbaev
ASTANA. 20 qarasha. QazAqparat - Halqy zańyn syılaıtyn, sotyna senetin qoǵam - eń damyǵan, eń turaqty qoǵam. Búgin Astanada ótip jatqan Qazaqstan sýdıalar odaǵynyń 6-y sezi barysynda sóz sóılegen QR Prezıdenti N. Nazarbaev osylaı málim etti.
«Qazaqta: «Bılik aıtý ońaı, bilip aıtý qıyn» degen sóz bar. Ádil qazylyq etý - kez kelgen sýdıanyń qasıetti paryzy. Bul úshin zańdy bes saýsaqtaı bilý jetkiliksiz. Eń bastysy, bı adal ári ádil bolýy kerek. «Qazy - halyqtyń ojdany» deıdi. Ol qara qyldy qaq jaratyn bolsa, daýgerler tóreliktiń durystyǵyna kúmán keltirmeıdi, aıypker de zań buzǵanda zaýal bar ekenin túsinedi. Biz - Máńgilik el bolamyz dep kemel memleketti kózdegen halyqpyz. Tarıhymyzda tuńǵysh ret táýelsizdik alyp, óz jolymyzdy mejelep, óz bolashaǵymyzǵa umtylǵan elmiz. Al sot tóreliginiń ádildigi men onyń sheshiminiń tolyqqandy oryndalýy kez kelgen eldiń kemel bolmysy bolyp sanalady», - dedi Elbasy. Bul rette Memleket basshysy sot júıesiniń damýy toqtap qalatyn qubylys emes ekenin, ony úzdiksiz jetildirip otyrýdyń qajettigin aıtyp, osy baǵytta jumystyń jalǵasatynyna da toqtaldy. «Sýdıalardan árqashan joǵary biliktilik pen ádildik, adaldyq talap etiledi. Halyqtyń da memlekettiń de talaby osy. Halqy zańyn syılaıtyn, sotyna senetin qoǵam - eń damyǵan, eń turaqty qoǵam. Bizdiń maqsatymyz da dál sondaı qoǵam qurý. «Qazaqstan -2050» strategııasynyń basty mejeleriniń biri de osy. Endeshe, aıqyn mindet pen belgili baǵyt boıynsha ózderińizge júktelgen mindetpen adal qyzmet etetinderińizge senemin. Sizderge ádil qyzmet pen ádil tórelik ár ýaqytta serik bolsyn», - dedi N. Nazarbaev.
