Halyqtyń taǵdyryna áser etetin sheshimderdi qabyldaıtyn adamnyń qoly taza bolýy kerek — Prezıdent

ASTANA. KAZINFORM — Kim qylmys jasaıdy — sol mindetti túrde jazasyn alady. Bul týraly Aýyl sharýashylyǵy eńbekkerleriniń ІІІ forýmynda Memleket basshysy Qasym-Jomart Toqaev aıtty.

Halyqtyń taǵdyryna áser etetin sheshimderdi qabyldaıtyn adamnyń qoly taza bolýy kerek — Prezıdent
Foto: Aqorda

— Qaıtalap aıtamyn, eshkim de zańnan bıik emes. Bul talap, ásirese, «Halyqtyq qurylys» baǵdarlamasyn júzege asyrý kezinde qatań saqtalýǵa tıis. Osy máselemen aınalysatyn arnaıy komıssııa óz jumysyn bastaıdy. Myna nárseni árdaıym qaperde ustaǵan jón: kim qylmys jasaıdy — sol mindetti túrde jazasyn alady. Kim óz jumysyna salǵyrt qaraıdy — sol ornynan bosatylady. Joǵary laýazym — eń aldymen joǵary jaýapkershilik degen sóz, — dedi Memleket basshysy.

Prezıdenttiń paıymynsha, halyqtyń taǵdyryna áser etetin sheshimderdi qabyldaıtyn adamnyń nıeti, oıy, qoly taza bolýy kerek.

— Árıne, biz azamattardyń elge sińirgen eńbegin joqqa shyǵarmaımyz. Biraq keshegi jetistigin buldap, arqany keńge salyp júrýge kimniń bolsa da haqy joq. Men úshin adamnyń shyqqan tegi, laýazymy emes, naǵyz isker bolǵany mańyzdy. Jalpy, iskerlik — memlekettik bılik júıesine ǵana emes, barlyq salaǵa qajet daǵdy. Halqymyz «Erdiń atyn eńbek shyǵarady» dep beker aıtpaǵan. Túptep kelgende, erlik jasaý — eldik muratqa qyzmet etý degen sóz. Ult múddesine minsiz jáne adal qyzmet etetin azamattarǵa árdaıym qurmet kórsetiledi. Bul — Ádiletti Qazaqstannyń myzǵymas qaǵıdaty. Qazir osy jerde jurtqa janashyr naǵyz adal azamattar otyr. Memleket sizderdi árdaıym qoldaıdy, eńbekterińizdi joǵary baǵalaıdy. Barshańyzǵa taǵy da alǵys aıtamyn, — dedi Qasym-Jomart Toqaev.