Halyqtyń tabysyn ınflıatsııadan qorǵaýdyń 3 jyldyq baǵdarlamasy qabyldandy

ASTANA. KAZINFORM — Úkimettiń, Ulttyq Banktiń jáne Qarjy naryǵyn retteý agenttiginiń makroekonomıkalyq turaqtandyrý jáne halyqtyń ál-aýqatyn arttyrý jónindegi 3 jyldyq birlesken is-qımyl baǵdarlamasy bekitildi.

— Baǵdarlama elimizdiń aldaǵy úsh jylǵa arnalǵan áleýmettik-ekonomıkalyq damýynyń negizgi mindetterin sheshýge baǵyttalǵan. Halyqtyń turmys deńgeıi men ál-aýqatyn arttyrý ekonomıkanyń sapaly ári ornyqty ósýi jáne ınflıatsııany tómendetý esebinen qamtamasyz etiledi, — dedi Premer-mınıstr Oljas Bektenov úkimet otyrysynda.

Aıtýynsha, baǵdarlama ekonomıkanyń jyl saıynǵy ósimin keminde 5%-ǵa, halyqtyń naqty tabysyn orta eseppen 2-3%-ǵa arttyrýǵa múmkindik beredi. 

— Jańa ınvestıtsııalyq tsıkldy iske qosý, bızneske bóget bolatyn kedergilerdi joıyp, memlekettiń ekonomıkadaǵy úlesin barynsha azaıtady. Sondaı-aq jumyspen qamtýǵa járdemdesip, áleýmettik qoldaýdy naqty ıesine jetkizýge múmkindik beredi. Inflıatsııany tómendetýge, teńgerimdi tarıftik saıasatty júrgizýge, eksportty ulǵaıtýǵa jáne ımportqa táýeldilikti tómendetýge basa nazar aýdarylady, — dedi Úkimet basshysy.

Baǵdarlamanyń ár baǵytyn oıdaǵydaı iske asyrý Premer-mınıstrdiń orynbasarlaryna tapsyryldy.

Aıta ketý kerek, búgin Úkimettiń, Ulttyq Banktiń jáne Qarjy naryǵyn retteý agenttiginiń makroekonomıkalyq turaqtandyrý jáne halyqtyń ál-aýqatyn arttyrý jónindegi 3 jyldyq birlesken is-qımyl baǵdarlamasy tanystyryldy. 

Osyǵan deıin Premer-mınıstr Oljas Bektenov Úkimet otyrysynda «Báıterek» holdınginiń fýnktsııasy keńeıetinin aıtty.