«Halyqtyń súıiktisi–2026» ulttyq syılyǵynyń XV maýsymy qorytyndylandy
ASTANA. LAZINFORM — Eldegi eń bedeldi qoǵamdyq marapattardyń biri — «Halyqtyń súıiktisi» ulttyq syılyǵynyń 15-maýsymynyń laýreattary belgili boldy.
— Bıyl qazaqstandyqtar óz súıiktilerin 15-ret tańdap otyr. Osy jyldar ishinde bul syılyq halyq seniminiń, qoǵamdyq baǵalaýdyń sımvolyna aınaldy. Daýys berý eki kezeńmen ótti: alǵashqysy Facebook jelisinde, qorytyndysy syılyqtyń resmı saıtynda júzege asyryldy. Sonymen qatar bıyl eki jańa atalym — Jyldyń jastar kóshbasshysy men Jyldyń medıa-tulǵasy engizildi, — dedi «Halyqtyń súıiktisi» ulttyq syılyǵynyń avtory ári bas uıymdastyrýshysy Ǵalym Baıtýk.
Qoǵamdyq senimdi basty qundylyqqa aınaldyrǵan bul syılyq jyl saıyn el ómirine eleýli úles qosqan azamattardy anyqtaıdy. Bıyl da bilim, medıtsına, ǵylym, sport, mádenıet pen qoǵamdyq qyzmet salalaryndaǵy úzdikter halyqtyń tikeleı tańdaýy arqyly anyqtaldy.
Syılyq aıasynda áleýmettik jobalardyń mańyzy aıryqsha atap ótildi. Sonyń ishinde Tımýr Qulybaevtyń «Halyq» qory júzege asyryp jatqan bastamalar jurtshylyqtyń joǵary baǵasyna ıe boldy. Qordyń «Aýyl sport» jobasy aýyl balalary úshin jańa múmkindikter ashyp, naqty nátıjelerimen erekshelenip otyr.
— «Aýyl sport» — bulaýyl balalarynyń bolashaǵyna salynǵan ınvestıtsııa. Joba aıasynda jattyqtyrýshylardy oqytý, sport túrlerin keńeıtý, halyqaralyq jarystarǵa jol ashý júıeli túrde júrgizilip keledi. Eki jyl ishinde jobaǵa 20 myńǵa jýyq bala tartyldy. Bul — bizdiń eń úlken jetistigimiz, — dedi Tımýr Qulybaevtyń «Halyq» qorynyń atqarýshy dırektory Ǵalymbek Jaqsylyqov.
«Halyqtyń súıiktisi — 2026» ulttyq syılyǵynyń jeńimpazdary:
Jyldyń úzdik muǵalimi — Bolat Amanqulov
Jyldyń úzdik dárigeri — Indıra Sarybaeva
Jyldyń úzdik sportshysy — Natalıa Bogdanova
Jyldyń úzdik telejúrgizýshisi — Saǵynysh Ábikeı
Jyldyń ǵalymy — Kúnsulý Zakarıa; Aralbaı Nuǵman
Jyldyń qoǵam qaıratkeri — Dınara Qudaıqulova
Jyldyń parlamentshisi — Únzıla Shapaq
Jyldyń mádenı jobasy — «Joshy han. Uly Ulystyń bıleýshisi»; «Botaı» memorıaly
Jyldyń medıa-tulǵasy — Ashat Aımaǵambetov
Jyldyń parasportshysy — Qýanysh Asqarbekov
Jyldyń jastar kóshbasshysy — Sultanbek Bekeshev
«Jyldyń mádenı jobasy» atalymynda «Joshy han. Uly Ulystyń bıleýshisi» derekti-kórkem tarıhı fılmi jeńiske jetti.
— Bıyl «Halyqtyń súıiktisi» syılyǵyn «Jyldyń mádenı jobasy» atalymynda alý biz úshin úlken qýanysh. Bul premııanyń ereksheligi — jeńimpazdardy qandaı da bir uıym nemese az ǵana qazylar alqasy emes, halyqtyń ózi anyqtaıdy. Áleýmettik jelilerdegi ashyq daýys berý arqyly kórermen tańdaý jasaıdy. Bul bizge úlken motıvatsııa beredi. Sondyqtan eń aldymen jobamyzǵa daýys bergen, qoldaý bildirgen barsha kórermenge alǵys aıtqym keledi. Sonymen qatar «Jibek joly» telearnasyna jáne jobany birlese júzege asyrǵan Prezıdent teleradıokesheniniń basshylyǵyna rızashylyǵymdy bildiremin, — dedi jobanyń avtory, «Jibek joly» telearnasynyń prodıýseri Maııa Bekbaeva.
Onyń aıtýynsha, fılm alty aı boıy túsirilgen jáne kınoteatrlarda jaqsy kórsetilim kórsetip, qalyń kórermenniń qyzyǵýshylyǵyna ıe bolǵan.
Budan bólek, «Altyn dáýir», «Tabys pen damý», «Jyl metsenaty», «Jyldyń áleýmettik bıznesi», «Jyl fermeri» jáne basqa da arnaıy atalymdar boıynsha úzdikter anyqtaldy.
Akademııa sheshimimen «Jyl fermeri» atalymy Aleksandr Zakýsılovqa, al «Óńirlik bıznes kóshbasshysy» atalymy Talǵat Salfıkovqa berildi.
Syılyq akademııasynyń quramyna qoǵam men saıasat, azamattyq sektorda tanylǵan tulǵalar endi. Olardyń qatarynda Murat Ábenov, Maıra Aısına, Aıgúl Soloveva, Irak Elekeev, Abzal Quspan, Serik Seıdýmanov, Serik Mambetov, Raısa Sher, Qýanysh Erǵalıev, Dıdar Smaǵulov, Talǵat Qalıev, Elsııar Qanaǵatov bar.
Aıta keteıik, buǵan deıin «Halyqtyń súıiktisi–2025» ulttyq syılyǵynyń qorytyndysyn jazǵan edik.