Halyqtyń sot júıesine senimi artty – Joǵarǵy sot
ASTANA. KAZINFORM – Ákimshilik sot salasyndaǵy reformanyń tıimdiligin aıqyn kórsetetin basty kórsetkishterdiń biri – halyqtyń sot júıesine degen seniminiń artýy. Bul týraly QR Joǵarǵy Sot tóraǵasy Aslambek Merǵalıev «Ákimshilik ádilet jáne onyń zań ústemdigin qamtamasyz etýdegi róli» forýmynda aıtty.
Ulttyq statıstıka bıýrosynyń derekterine sáıkes, sot organdaryna tolyq senim bildiretin azamattardyń úlesi 63,2 paıyzǵa jetken. Al 2023 jyly bul kórsetkish 55,2 paıyz bolǵan edi.
– Ákimshilik ádilet júıesi memlekettik basqarýdaǵy quqyqtyq mádenıettiń ózgerýine yqpal etti. Endi memlekettik qyzmetshi óz ókilettigine ǵana súıenip sheshim qabyldaı almaıdy. Ol qabyldaǵan sheshiminiń zańdylyǵyn, negizdiligin jáne ádildigin dáleldeýge mindetti. Osylaısha, memlekettik múddeni memlekettik organ ustanymyn sózsiz qoldaýmen teńestirý tájirıbesinen aryldyq, – dedi Joǵarǵy sot tóraǵasy.
Búginde sot tájirıbesi múlde basqa qaǵıdaǵa negizdeledi: memlekettiń shynaıy múddesi – zańnyń saqtalýy, ádildik pen sot aldyndaǵy barshanyń teńdigin qamtamasyz etý.
– Ótken jyldary ákimshilik ádilet júıesi ınstıtýtsıonaldyq reformalardy ilgeriletetin mańyzdy tetikke aınaldy. Bul jańashyldyqtardyń barlyǵy bir maqsatqa – azamattarǵa sot tóreligin qoljetimdi, túsinikti ári ádil etýge baǵyttalǵan, – dedi A.Merǵalıev.
Aıta keteıik, elordada Memleket basshysynyń qatysýymen eldegi ákimshilik ádiletke arnalǵan forým ótip jatyr.
