Halyqtyń shamadan tys kredıt alýy úlken problemaǵa aınaldy – Úkimet basshysy

Elimizde halyqtyń shamadan tys kredıt alýy máselesi ózekti. Muny Úkimet basshysy Álıhan Smaıylov kóterdi, dep habarlaıdy Kazinform.

«Halyqtyń shamadan tys kredıt alýy úlken áleýmettik-ekonomıkalyq problemaǵa aınalyp barady. Bıyl 1-shi qyrkúıektegi jaǵdaı boıynsha bankterdiń tutyný kredıtteriniń portfeli 9,2 trln teńgeni quraǵan. Bul oraıda, bir qaryz alýshyǵa shaqqandaǵy bereshektiń ortasha mólsheri shamamen 1,5 mln teńgeni, al problemalyq tutyný kredıtteri boıynsha 1 mln teńgeni quraıdy. Keıbir azamattar merzimi ótip ketken kredıtterin jabý úshin odan da joǵary paıyzben jańa kredıtter alady. Osylaısha, shekteýsiz kredıt alyp, qaryzǵa belshesinen bata beredi. Al, bank kredıt berýden bas tartqan jaǵdaıda, olar paıyzdyq ústemesi óte joǵary mıkroqarjy uıymdaryna júginedi", - dedi Úkimet basshysy.

Premer-Mınıstrdiń málimdeýinshe, adamdar qarjylyq saýatsyzdyǵynyń kesirinen jaǵdaııyn qıyndata beredi.

«Bul máseleni sheshý maqsatynda Memleket basshysy «Qaryzsyz qoǵam» jobasynyń aýqymyn keńeıtýdi tapsyrdy. Joba halyqtyń qarjylyq saýattylyǵyn arttyrýǵa, azamattardyń kredıtt boıynsha problemalyq bereshekterin retteýde jáne jumysqa ornalasýda konsýltatsııalyq kómek berýge baǵyttalǵan. Qazirdiń ózinde Qazaqstannyń 8 óńirinde 45 myń adam qarjylyq saýattylyq negizderi boıynsha bilim aldy. 2023-shi jyldyń sońyna deıin 60 myń azamatty qamtý josparlanýda», - deıdi ol.