Halyqtyń senimi – ámııan emes: Perızat Qaırat sotynda prokýror málimdeme jasady

ASTANA. KAZINFORM – Astanada Perızat Qaıratqa qatysty qylmystyq is boıynsha taraptardyń jaryssózi bastaldy. Memlekettik aıyptaýshy Mádına Orazalına sotta sóz sóılep, aıyptaýdyń basty ustanymy – qaıyrymdylyqty jeke bastyń múddesine paıdalanýǵa jol bermeý ekenin aıtty.

– Qaıyrymdylyq jeke múdde úshin paıdalanatyn syltaý bola almaıdy. Endi bas paıdasy úshin qoǵamnyń áleýmettik sezimtaldyǵyn qoldanyp qalǵysy kelgender mynany bilýi kerek: memleket buǵan kóz jumyp qaramaıdy, al halyqtyń senimi – sheksiz emes. Meıirim men ózgeniń qaıǵysyn paıdaǵa asyrýdyń arasynda aıqyn shekara bolýy kerek, – dedi M.Orazalına.

Prokýrordyń aıtýynsha, bul is áleýmettik mańyzy bar taqyryptardy ózin kórsetý quralyna aınaldyrǵandarǵa eskertý bolýy kerek.

– Eger bireý taǵy da izgilik betperdesin taǵyp, qazaqstandyqtardyń jomarttyǵy arqyly paıda tapqysy kelse, ony qoshemet emes, sot kútip tur. Halyqtyń senimi – brend te, ámııan da emes, bul amanat. Al amanatqa qııanat jasaǵan adam jurtshylyq aldynda áshkere bolady. Qazaqstan tarıhynda shyn metsenattar bolǵan – olar kómekti únsiz, kamerasyz kórsetken, – dep atap ótti memlekettik aıyptaýshy.

Buǵan deıin Perızat Qaırat daıyn dıplom satyp alǵysy kelgen áreketi týraly jazǵan edik. 

Sondaı-aq kýáger Perızat Qaırat qor qarjysyn qalaı qolma-qol aqshaǵa aýdarǵanyn aıtyp berdi. 

Sot barysynda áıgili ánshi, otandasymyz Dımash Qudaıbergenniń esimi ataldy.

Belgili bolǵandaı tasqyn kezinde Nazarbaev zııatkerlik mektebiniń qyzmetkerleri 2,9 mln teńge joldaǵan. 

Іsti qaraý kezinde Perızat Qaırat jetekshilik etken qorǵa qarjy aýdarǵan 47 adam jábirlenýshi dep tanyldy.