Halyqtyń ekologııalyq mádenıetin arttyrý boıynsha naqty usynystar ázirleý kerek — Bektenov

ASTANA. KAZINFORM — Úkimet basshysy Oljas Bektenov birqatar quzyrly organǵa tapsyrma berdi.

— Týrızm jáne sport mınıstrligi óńir ákimdikterimen birlesip, árbir eldi meken boıynsha barlyq buqaralyq sporttyq is-sharanyń biryńǵaı kúntizbesin ázirleýge tıis. Sondaı-aq jalpyǵa birdeı paıdalanýǵa arnalǵan negizgi ekotýrızm obektileriniń kartasyn jasap, onda ornalasqan jeri, týrıstik obektiler jáne basqa da qajetti málimetter kórsetilýi kerek, — dedi Oljas Bektenov Úkimet otyrysynda.

Sondaı-aq premer-mınıstr Mádenıet jáne aqparat mınıstrligine ekologııalyq jáne rýhanı mádenıetti tárbıeleý jóninde naqty usynystar ázirleýdi tapsyrdy. 

— Mádenıet jáne aqparat mınıstrligi múddeli memlekettik organdarmen birlesip, bir aı merzimde halyq arasynda ekologııalyq jáne rýhanı mádenıetti tárbıeleý jóninde naqty usynystar ázirlesin. Atqarylǵan jumystyń qorytyndysy boıynsha ekologııalyq mádenıetti damytýdyń «Taza Qazaqstan» tujyrymdamasyn ózektendirý qajet, — deıdi ol.

Buǵan deıin Premer-mınıstr qoqys tastaıtyn adamdarǵa jazany qatańdatýdy tapsyrdy. 

Óz kezeginde Ekologııa mınıstri qazaqstandyqtar qandaı ekologııalyq problemalarǵa jıi shaǵymdanatynyn aıtty.