Halyqtyń boryshtyq júktemesiniń ósýin shekteý úshin makroprýdentsııalyq qural engiziledi — UB
ASTANA. KAZINFORM — 2026 jylǵy 1 qańtardan bastap bólshek nesıeleýge qatysty dıfferentsıaldy salyq salý tetigi engiziledi. Bul týraly Ulttyq bank tóraǵasy Tımýr Súleımenov aıtty.
— Ulttyq banktiń bastamasymen 2026 jylǵy 1 qańtardan bastap bólshek nesıeleýge qatysty dıfferentsıaldy salyq salý tetigi engiziledi. Osylaısha, bankterdiń bólshek nesıeleýden jáne ózge de tabystarynan túsetin KTS mólsherlemesi 25 paıyz deńgeıinde belgilenedi. Ulttyq bank agenttikpen (Qarjy naryǵyn retteý jáne damytý agenttigi) birlesip, qabyldanǵan sharalardy odan ári iske asyra túsedi. Sondaı-aq, tutynýshylyq kredıtteý qarqynyn jáne ınflıatsııa deńgeıin tómendetýge baǵyttalǵan qosymsha tetikter ázirleıdi, — dedi Tımýr Súleımenov.
Onyń aıtýynsha, jeke tulǵalar nesıelerine qatysty sektoraldy kontrtsıkldik kapıtal býferin odan ári arttyrý máselesi pysyqtalady. Ádistemeni jetildirý aıasynda boryshtyq júkteme koeffıtsıentin esepteý kezinde qoldanylatyn tabys ólshemderin qaıta qaraý júrgiziledi. Budan bólek, halyqtyń jıyntyq boryshtyq júktemesiniń ósýin shekteý maqsatynda jańa makroprýdentsııalyq qural — qaryzdyń tabysqa qatynasy koeffıtsıenti engiziledi. BNPL sektory, ıaǵnı bólip tóleý júıesi boıynsha retteý tásilderi ázirlenedi.
— Atalǵan sharalardyń barlyǵy, sózsiz, ınflıatsııamen kúreske óz úlesin qosady. Alaıda, aqsha-kredıt saıasatynyń negizgi quraly — bazalyq mólsherleme bolyp qala beredi. Dál osy kórsetkish aqsha-kredıt sharttarynyń deńgeıin aıqyndaıdy. Sondyqtan búgin bazalyq mólsherlemeni aqsha-kredıt saıasatynyń qalypty qatań ustanymyn qalpyna keltiretin deńgeıge deıin kóterdik. Ulttyq bank ınflıatsııany tómendetý úshin aqsha-kredıt saıasaty aıasyndaǵy barlyq qajetti sharany qabyldaıdy. Tómen jáne turaqty ınflıatsııa — elimizdiń iskerlik ortasyn damytýǵa, halyqtyń ál-aýqatyn arttyrýǵa jáne elimizdiń ekonomıkalyq ósimin qamtamasyz etýge qosar basty úlesimiz, — dedi Tımýr Súleımenov.
Buǵan deıin Ulttyq bankiniń Aqsha-kredıt saıasaty komıteti bazalyq mólsherlemeni +/- 1 p. t. dálizimen jyldyq 18 paıyz deńgeıinde belgileý týraly sheshim qabyldaǵan edi.
Sonymen qatar osyǵan deıin Súleımenov aqsha-kredıt sharttary ınflıatsııany turaqtandyrýǵa jetkiliksiz bolsa qosymsha sharalar qaralatynyn aıtty.