Halyqtyń 86%-y Qazaqstan Prezıdentine senim bildiredi
ASTANA. KAZINFORM — 2025 jyldyń qazan aıynda QSZI tapsyrysy boıynsha júrgizilgen qoǵamdyq pikirdi zertteý nátıjelerine sáıkes, Qazaqstan Respýblıkasy Prezıdentine halyq senimi joǵary deńgeıde saqtalyp otyr. Bul týraly QR Prezıdenti janyndaǵy Qazaqstannyń strategııalyq zertteýler ınstıtýty málim etti.
Memleket basshysyna degen halyq senimi 86%-dy qurady. Bul kórsetkish sońǵy birneshe jylda turaqty túrde saqtalyp keledi jáne ol qoǵam tarapynan eldi jańǵyrtý men jańartý baǵytyn qoldaý úrdisiniń turaqtylyǵyn kórsetedi.
— Senimniń eń joǵary deńgeıi jastar arasynda tirkelip otyr (90,1%). Respondentter neǵurlym jas bolǵan saıyn, olardyń Prezıdentke seniminde jańashyldyqtan, ózgeristerden úmiti joǵary. Al aǵa býyn jasy ulǵaıǵan saıyn, kerisinshe, bul ózgeristerdiń olardyń qalyptasqan ómir saltyn buzbaǵanyn qalaıdy. Osy kóńil-kúılerdiń toǵysýy búginde azamattardyń basym bóligin biriktirip otyrǵan turaqty jańarý baǵytyna súıenish bolyp otyr, — delingen habarlamada.
Halyqtyń Prezıdentke senim deńgeıi bilim deńgeıiniń joǵarylaýymen qatar ósip keledi. Bilim deńgeıi joǵarylaǵan saıyn adamdar reformalardyń baǵyt pen logıkasy bar ekenin, olardyń kezdeısoq emes, júıeli ári sanaly túrde júzege asyp jatqanyn kóbirek sezinedi.
— Prezıdentke degen senimniń joǵary deńgeıi tek qana qala turǵyndary arasynda ǵana emes (85%), aýyl turǵyndary arasynda da saqtalyp otyr (87,6%). Aýyl turǵyndary dástúrli túrde memleketpen is júzinde, ıaǵnı ınfraqurylym, baǵdarlamalar men tólemder arqyly tyǵyz baılanysty. Al qala turǵyndarynyń senimi ratsıonaldy sıpatta bolyp, ózgeristerdi júıe retinde qabyldaýymen kóbirek baılanysty, — dep habarlady QSZI-den.
Sondaı-aq, Prezıdentke erler de, áıelder de teń dárejede senim bildiredi. Turaqtylyq pen erteńgi kúnge qatysty senimde tek erlerge tán, ne tek áıelderge tán kózqaras joq, kerisinshe «memlekettiń baǵyty berik saqtalýy tıis» degen ortaq túsinik bar.
Osylaısha, qoǵamdaǵy senimniń áleýmettik portreti el ishindegi kelisim men tutastyqty aıqyndaıdy. Ár áleýmettik top senimniń sebepterin ózinshe túsindirse de, barlyǵynyń ortaq tilegi bir — Qazaqstannyń turaqty, sabaqtastyǵy saqtalǵan ári ádiletti damýy.
Áleýmettanýlyq saýalnama QSZI tapsyrysymen 2025 jylǵy 3 qazan men 5 qarasha aralyǵynda júrgizildi. Іrikteme kólemi 8000 respondentti quraıdy. Saýalnamaǵa 17 oblys pen 3 respýblıkalyq mańyzy bar qala — Astana, Almaty jáne Shymkent qalalarynyń 18 jastan asqan respondentteri qatysqan.
Buǵan deıin habarlanǵandaı, Qazaqstan strategııalyq zertteýler ınstıtýty jańa talqylaý alańyn ashty.