Halyqtyq meıramdarǵa basa nazar aýdarýymyz qajet – Assambleıanyń HHHІV sessııasy

ASTANA. KAZINFORM – Memleket basshysy Qasym-Jomart Toqaev Qazaqstan halqy Assambleıasynyń HHHІV sessııasynda halyqtyq meıramdarǵa basa nazar aýdarý qajettigin aıtty.

- Bıyl pravoslav jáne katolık qaýymdarynyń Pasha meıramy qatar keldi. Munyń sımvoldyq máni zor. Bul – sırek qaıtalanatyn qubylys. Oraıly sátti paıdalana otyryp, elimizdegi barsha hrıstıandardy osynaý merekemen taǵy da quttyqtaımyn. Sheteldik qonaqtar Qazaqstanda túrli salt-dástúrdiń bir-birimen úılesim tapqanyna tań qalady.

Bul olar úshin mýltıkýltýralızm jáne mýltıetnıkalyq tujyrymdamalar toqyraýǵa ushyrap, tipti, joqqa shyǵarylyp, batys álemi jahandanýdan bas tartyp, oqshaýlanýǵa qadam basyp jatqan kezeńde qaıran qalarlyq qubylys. Bizdiń is júzindegi tájirıbemizden mádenıetti jatsynbaıtyn biregeı bolmysymyzdy ańǵarýǵa bolady. Dilimiz ben turmys saltymyzdyń bir bóligine aınalǵan naǵyz halyqtyq meıramdarǵa basa nazar aýdarýymyz qajet, - dedi Qasym-Jomart Toqaev.

Memleket basyshsy «Naýryz», «Maslenıtsa», «Sabantoı» jáne basqa da halyqtyq merekeler as iship, aıaq bosatatyn, kóńil kóteretin ǵana emes, ultymyzdyń rýhy men tarıhyn kórsetetin is-sharalar ekenin atap ótti.

- Qazaqstandaǵy kóptegen etnostyń dástúri, tili, ádet-ǵurpy osy jıyndarda toǵysady. Bul – «Birligimiz – áralýandyqta» degen qaǵıdattyń naqty kórinisi, - dedi Prezıdent.

Aıta keteıik, elordadaǵy Táýelsizdik saraıynda Memleket basshysy Qasym-Jomart Toqaevtyń qatysýymen Qazaqstan halqy Assambleıasynyń kezekti HHHІV sessııasy ótip jatyr. 

Keńeıtilgen otyrystyń kún tártibi — «Qazaqstan halqy Assambleıasynyń 30 jyldyǵy: qorytyndylar jáne bolashaq mindetter».