«Halyqtyq qurylys» jobasynda tsıfrlyq teńge qoldanylýy múmkin
ASTANA. KAZINFORM — Ulttyq bank «Halyqtyq qurylys» bastamasy aıasyndaǵy keıbir jobalarda tsıfrlyq teńgeni paıdalanýǵa daıyn. Alaıda bul úshin salalyq memlekettik organdardyń da tıisti tsıfrlyq ınfraqurylymy bolýy qajet. Bul týraly Ulttyq bank tóraǵasynyń orynbasary Aqyljan Baımaǵambetov aıtty.
Onyń sózinshe, tsıfrlyq teńgeni jekelegen jobalarda paıdalaný múmkindigi qarastyrylyp otyr, biraq bul bastamany júzege asyrý tek Ulttyq banktiń ǵana daıyndyǵyna baılanysty emes.
— Biz tsıfrlyq teńgeni «Halyqtyq qurylys» aıasynda paıdalanýǵa usynýǵa daıynbyz. Keıbir jobalar tsıfrlyq teńgemen júzege asyrylýy múmkin. Biraq bul ekijaqty protsess. Munda salalyq memlekettik organdardyń da daıyndyǵy qajet, — dedi Aqyljan Baımaǵambetov.
Onyń aıtýynsha, tsıfrlyq teńgeniń múmkindigin tolyq paıdalaný úshin tek tólem júıesin tsıfrlandyrý jetkiliksiz. Jobalardy iske asyratyn salalyq platformalar men tıisti ınfraqurylym da daıyn bolýy kerek.
Aıta keteıik, buǵan deıin, joldaýda Prezıdent úlken qurylys qozǵalysyna «Halyqtyq qurylys» degen ataý berýdi usynǵan edi.
