«Halyqtyq qurylys» paıda tabatyn naýqanǵa aınalmaý kerek – depýtat
ASTANA. KAZINFORM – Prezıdent Joldaýyndaǵy «Halyqtyq qurylys» bastamasy óńirlerdiń damýyna qalaı áser etedi? Bul týraly Quryltaı depýtaty Oljas Quspekov Jibek Joly telearnasyndaǵy «Búgin Live» baǵdarlamasynda pikir bildirdi.
Depýtattyń aıtýynsha, bastama halyqtyń turmys sapasyn jaqsartyp, óńirlerdegi ınfraqurylym máselelerin sheshýge baǵyttalǵan. Osy maqsatta aýyz sýmen qamtý, káriz júıesin damytý, joldardy jóndeý, aýyldardy gazben qamtamasyz etý jáne turǵyn úı-kommýnaldyq sharýashylyqty jańǵyrtý josparlanǵan. Sonymen qatar 70-ke jýyq densaýlyq saqtaý nysany, 50-ge jýyq bilim berý, sport jáne mádenıet mekemesi salynbaq.
Jobalardy iske asyrý úshin jyl sońyna deıin memlekettik komıssııa qurylyp, aýyl-aımaqtaǵy ózekti máselelerdiń tizimi jasaqtalady. Bul jumysqa óńirlerden saılanǵan depýtattar da qatysyp, jergilikti qajettilikterdi eskerýge atsalysady. Oljas Quspekovtiń sózinshe, negizgi máselelerdi 2029–2030 jyldarǵa deıin sheshý kózdelip otyr.
– Bastamanyń nátıjeli júzege asýy úshin óńirlerden saılanǵan depýtattar, oblys ákimdikteri men qurylys kompanııalary birlesip jumys isteýi kerek, – dedi ol.
Osy rette depýtat jergilikti qurylys kompanııalaryn jobalarǵa tartý mańyzdy ekenin atap ótti. Onyń pikirinshe, bul óńirlik kásiporyndardyń tájirıbe jınaqtap, bolashaqta óz betinshe ınvestıtsııa salýyna múmkindik beredi. Sonymen birge qurylys sapasyn baqylaý, merdigerlerdiń jaýapkershiligin arttyrý jáne qysqa merzimge ǵana qurylyp, keıin jumysyn toqtatatyn kompanııalarǵa jol bermeý qajet. Ol úshin lıtsenzııa berý men qurylys jumystaryn qadaǵalaý júıesin jetildirý mańyzdy.
– Ár qurylystyń óz merzimi bar. Bir jyldan keıin halyqpen kezdesip, eldi aralaımyz. Toqtap qalǵan nemese máselesi bar nysandardyń jaǵdaıyn tekseremiz. Eń bastysy, bul bastama ýaqytsha, paıda tabatyn naýqanǵa aınalmaı, halyqtyń ıgiligine qyzmet etýi kerek, – dedi Oljas Quspekov.
Aıta keteıik, Úkimet Prezıdent Joldaýyn iske asyrý sharalaryn qarastyrady.
