«Halyqtyq qurylys» komıssııasynyń quramyn qarap jatyrmyn – Prezıdent
ASTANA. KAZINFORM – «Qurylys jáne taǵy da qurylys» – jańǵyrý jolyna túsken Qazaqstannyń myzǵymas qaǵıdaty, jalpyulttyq urany bolýǵa tıis. Bul pikirdi Prezıdent Qasym-Jomart Toqaev «Qazaq tili» qoǵamynyń H quryltaıynda aıtty.
– Eń mańyzdy másele – biz keleshek urpaqqa tujyrymdamalar men josparlar, sheteldegi qundy qaǵazdarda saqtalǵan, ýaqyt ótken saıyn arzandap bara jatqan qarjyny emes, halyqqa qyzmet etetin naqty áleýmettik nysandardy amanat retinde qaldyrýymyz kerek. Qurylyspen aınalysý – jasampazdyqqa, jańashyldyqqa umtylý. Sondyqtan «Qurylys jáne taǵy da qurylys» degen bir aýyz sóz jańǵyrý jolyna túsken Qazaqstannyń myzǵymas qaǵıdaty, jalpyulttyq urany bolýǵa tıis, – Memleket basshysy.
Prezıdenttiń pikirinshe, «Halyqtyq qurylys» jurtymyzdy bir maqsat pen múddege biriktiredi, elimizdi naǵyz órleý men órkendeý jolyna bastaıdy.
Osyǵan oraı, aldaǵy úsh jyldyń ishinde Ulttyq qordan 6,5 trıllıon teńge bólinedi.
– Arnaıy komıssııa bul aýqymdy qarajattyń únemdi, jymqyrýsyz jumsalýyn muqııat baqylaýda ustaıdy. Qazir bul Komıssııanyń quramyn qarap jatyrmyn. Eń basty talap – músheler aıqaı-shýsyz, dańǵaza jasamaı, óz jumysyn joǵary kásibı deńgeıde, tıimdi atqarýy kerek, – dedi Q. Toqaev.
Buǵan deıin Memleket basshysy Qasym-Jomart Toqaev «Halyqtyq qurylys» baǵdarlamasyna bólinetin bıýdjet qarajatynyń jumsalýyn baqylaıtyn memlekettik komıssııa qurýdy usyndy.
Búgin de Prezıdent Táýelsiz Qazaqstan tarıhynda mundaı aýqymdy joba bolmaǵanyn, otandyq kásipkerlerge mol múmkindikter beriletinin aıtty.
