«Halyqtyq qurylys»: Qazaqstannyń sý salasyna 757 arnaıy tehnıka alynady
ASTANA. KAZINFORM – «Halyqtyq qurylys» aıasynda ınfraqurylymdy jańartý jańa nysandar salýmen ǵana shektelmeıdi. Osy maqsatta Qazaqstannyń sý salasynyń materıaldyq-tehnıkalyq bazasyn nyǵaıtý úshin 700-den astam arnaıy tehnıka satyp alý kózdelgen.
Bul týraly Sý resýrstary jáne ırrıgatsııa vıtse-mınıstri Jandos Sálimov baıandady.
Vıtse-mınıstr «Qazsýshar» RMK-nyń materıaldyq-tehnıkalyq bazasyn nyǵaıtý maqsatynda 757 arnaıy tehnıka satyp alýǵa qarjylyq lızıng sharty jasalǵanyn aıtty. Qazirgi ýaqytta onyń 650 danasy jetkizildi.
Jańa tehnıkalar kásiporynnyń materıaldyq-tehnıkalyq bazasyn nyǵaıtýǵa jáne sý sharýashylyǵy nysandaryn kútip ustaý múmkindigin arttyrýǵa baǵyttalǵan.
– 101 bıýdjettik baǵdarlama sheńberinde bıyl respýblıkalyq mańyzy bar, sý jetkizýge tikeleı qatysy joq 107 gıdrotehnıkalyq qurylysta jóndeý jumystary júrgiziledi. Jyldyq jospardyń 80 paıyzy oryndaldy. Qalǵan jumysty jyl sońyna deıin aıaqtaý josparlanǵan, – dedi J. Sálimov Ortalyq kommýnıkatsııalar qyzmetinde ótken baspasóz máslıhatynda.
Kanaldardyń sý ótkizý qabiletin jaqsartý úshin olardy mehanıkalyq tazartý jumystary da júrgizilip jatyr.
Byltyr 1 840 shaqyrym kanal tazartylsa, bıyl josparlanǵan 3 606 shaqyrymnyń 2 342 shaqyrymynda jumys oryndaldy. Qalǵan bóligin jyl sońyna deıin tazartý kózdelgen. Al 2027 jyly taǵy 3 800 shaqyrym kanal mehanıkalyq tazartýdan ótedi.
Tabıǵı ekojúıelerdi saqtaý úshin de sý jiberý kólemi belgilengen. Bıyl osy maqsatqa 1,926 mlrd tekshe metr sý bólý josparlanǵan. Qazirgi ýaqytta onyń 1,905 mlrd tekshe metri jiberildi.
Aıta keteıik, Qazaqstanda 2030 jylǵa deıin 42 jańa sý qoımasy salynady. Sondaı-aq 37 sý qoımasy men 110 gıdrotehnıkalyq qurylys qaıta jańǵyrtylyp, 14,5 myń shaqyrym kanal jóndeledi.
Sonymen birge, sý sharýashylyǵy mamandarynyń jalaqysy taǵy 15% ósti.
