«Halyqtyq qurylys» aıasynda Mańǵystaýda qandaı nysandar salynady
ASTANA. KAZINFORM — Mańǵystaý oblysynda Memleket basshysynyń «Jańa tarıhı kezeńdegi Qazaqstannyń ózekti mindetteri» atty Qazaqstan halqyna Joldaýyn túsindirý maqsatynda qurylǵan jumys toptary óńir turǵyndary jáne eńbek ujymdarymen birqatar kezdesý ótkizdi.
Jańaózen qalasynda Quryltaı depýtaty Abbat Órisbaev qalalyq kópsalaly aýrýhananyń medıtsına qyzmetkerlerimen kezdesti. Jıynǵa qala ákimi Symbat Tóretaev, QR Densaýlyq saqtaý mınıstrligi Medıtsınalyq baqylaý komıtetiniń tóraıymy Laýra Ahmetnııaz jáne «Ádilet» partııasy oblystyq fılıalynyń tóraǵasy Imammahmut Shaǵyrbaev qatysty.
Kezdesý barysynda Abbat Órisbaev Memleket basshysynyń Joldaýynda belgilengen mindetterdiń eldiń saıası jáne áleýmettik-ekonomıkalyq damýy úshin mańyzyna toqtaldy. Onyń aıtýynsha, bıylǵy Joldaý elimizdiń 35 jyldyq Táýelsizdigi qarsańyndaǵy aýqymdy saıası reformalardyń jalǵasy bolyp sanalady. Atap aıtqanda, jańa Konstıtýtsııanyń qabyldanýy, birpalataly Parlamenttiń saılanýy, Halyq keńesiniń jumysyn bastaýy jáne Vıtse-prezıdent ınstıtýtynyń qurylýy el basqarý júıesindegi mańyzdy ózgeristerdiń biri.
Sonymen qatar depýtat óńirde «Halyqtyq qurylys» jobasy aıasynda júzege asyrylatyn medıtsınalyq ınfraqurylymdy damytý bastamalaryna nazar aýdardy. Joldaýda halyqtyń ómir sapasyn jaqsartý, medıtsınalyq qyzmettiń qoljetimdiligin arttyrý jáne áleýmettik nysandardy jańǵyrtý máseleleri basym baǵyttardyń biri retinde aıqyndalǵanyn jetkizdi.
Al QR Densaýlyq saqtaý mınıstrligi Medıtsınalyq baqylaý komıtetiniń tóraıymy Laýra Ahmetnııaz sala boıynsha aldaǵy ýaqytta atqarylatyn aýqymdy jobalarǵa toqtaldy. Ol medıtsınalyq ınfraqurylymdy jańǵyrtý, ana men bala densaýlyǵyn qorǵaý jáne densaýlyq saqtaý salasyna ozyq tehnologııalardy engizý baǵytyndaǵy jumystardy atap ótti.
Budan keıin jumys toby Mańǵystaý atom energetıkalyq kombınatynyń (MAEK) qyzmetkerlerimen kezdesti. Jıynǵa Qazaqstan Halyq keńesiniń múshesi, Mańǵystaý oblysy qoǵamdyq keńesiniń tóraǵasy Bekmurat Júsipov, oblystyq aqsaqaldar keńesiniń tóraǵasy Ońaıbek Ábdilov, Qazaqstan Halyq keńesiniń múshesi, ekolog Kırıll Osın jáne «Ádilet» partııasy oblystyq fılıaly tóraǵasynyń orynbasary Anar Shamshadınova qatysty.
Kezdesýde eldiń ekonomıkalyq damýy, energetıkalyq qaýipsizdik, kólik-logıstıka áleýeti, áleýmettik ınfraqurylymdy jetildirý jáne qoǵamdyq kelisimdi nyǵaıtý máseleleri talqylandy. Sondaı-aq Qazaqstannyń tranzıttik múmkindikterin arttyrý, AES salý, Kendirli áýejaıyn iske qosý jáne óńirdiń týrıstik áleýetin damytý baǵyttaryna nazar aýdaryldy.
Qazaqstan Halyq keńesiniń múshesi Bekmurat Júsipov óńirdegi áleýmettik ınfraqurylymdy damytý máselesine toqtaldy. Onyń aıtýynsha, Mańǵystaýda bala týý kórsetkishiniń joǵary bolýyna baılanysty ana men bala densaýlyǵyn qorǵaý baǵytyndaǵy nysandardyń mańyzy zor. Osy rette Aqtaý qalasynda 350 oryndyq kópbeıindi balalar aýrýhanasyn salý josparlanyp otyrǵanyn jetkizdi.
Budan bólek, jumys toby «QazAzot» aktsıonerlik qoǵamynyń eńbek ujymymen de kezdesti. Jıynda «Ádilet» partııasy oblystyq fılıaly tóraǵasynyń orynbasary Anar Shamshadınova Joldaýdaǵy halyqtyń ál-aýqatyn arttyrýǵa baǵyttalǵan bastamalardy túsindirdi. Atap aıtqanda, «Halyqtyq qurylys» bastamasy aıasynda densaýlyq saqtaý salasynda 70-ten astam, bilim berý jáne mádenıet baǵytynda 50-den astam nysan salý josparlanǵanyn aıtty. Sondaı-aq energetıkalyq qaýipsizdik, ınfraqurylym jáne shaǵyn jáne orta bıznesti qoldaý máseleleri sóz boldy.
Sonymen qatar Aqtaý qalasynda bilim berý salasy men etnomádenı birlestikter ókilderiniń qatysýymen kezdesý uıymdastyryldy. Oǵan QR Ulttyq ekonomıka mınıstrligi Tabıǵı monopolııalardy retteý komıtetiniń tóraǵasy Tımýr Qosymbaev, Qazaqstan Halyq keńesiniń múshesi Raýshan Aımýrzaeva, oblystyq aqparat jáne qoǵamdyq damý basqarmasynyń basshysy Gúlmıra Balǵojaeva, «Ádilet» partııasy oblystyq fılıaly tóraǵasynyń orynbasary Nurbek Qarasaev jáne «Bereket-F» kompanııasynyń bas dırektory Zareta Fatalıeva qatysty.
Jıynda bilim berý ınfraqurylymyn damytý, áleýmettik nysandardyń qoljetimdiligin arttyrý, etnosaralyq kelisim men qoǵamdyq turaqtylyqty saqtaý máseleleri qozǵaldy.
«Ádilet» partııasy oblystyq fılıaly tóraǵasynyń orynbasary Nurbek Qarasaevtyń aıtýynsha, Memleket basshysynyń Joldaýynda elimizdiń aldaǵy damý kezeńine arnalǵan mańyzdy mindetter aıqyndalǵan. Sondyqtan ondaǵy bastamalardyń mazmunyn ár sala ókilderine túsindirip, olardy iske asyrý joldaryn talqylaý mańyzdy. Onyń sózinshe, mundaı kezdesýler halyq pen memlekettik organdar arasyndaǵy ózara baılanysty nyǵaıtyp, óńirdegi ózekti máselelerdi ortaǵa salýǵa múmkindik beredi.
Óz kezeginde QR Ulttyq ekonomıka mınıstrligi Tabıǵı monopolııalardy retteý komıtetiniń tóraǵasy Tımýr Qosymbaev bilim berý nysandaryn salý jáne kúrdeli jóndeýden ótkizý tártibin túsindirip, jergilikti deńgeıde jobalardy sapaly ázirlep, qajetti qujattardy ýaqytyly usynýdyń mańyzyn atap ótti. Sondaı-aq mınıstrlik komıteti óz quzyreti sheńberinde óńirdegi áleýmettik nysandardy damytýǵa baǵyttalǵan bastamalardy qoldaýǵa jáne tıisti deńgeıde kóterýge daıyn ekenin jetkizdi.
Kezdesýler barysynda qatysýshylar ózderin tolǵandyrǵan suraqtaryn qoıyp, usynys-pikirlerin ortaǵa saldy. Jumys toptarynyń ókilderi Joldaýda belgilengen mindetterdi júzege asyrý tetikteri boıynsha túsinikteme berdi.
Osyǵan deıin Mańǵystaýda quny 175,7 mln teńgeniń jer ýchaskeleri memleketke qaıtarylǵanyn jazǵanbyz.
