Halyqtyq qurylys: Almatydaǵy LRT jáne SkyTrain jobalary jaıly ne belgili

ALMATY. KAZINFORM — Almatyda kóshe-jol jelisindegi júktemeni azaıtýǵa baǵyttalǵan iri jobalar júzege asyrylyp jatyr. Olar týraly Kazinform tilshisine Almaty qalasy jol ınfraqurylymyn damytý basqarmasynyń basshysy Oljas Shabdanov aıtyp berdi.

Halyqtyq qurylys: Almatydaǵy LRT jáne SkyTrain jobalary jaıly ne belgili
Foto: Dosbol Atajan\Kazinform

Oljas Shabdanovtyń aıtýynsha, Almaty qalasynyń 2040 jylǵa deıingi Bas josparyna engizilgen ózgerister aıasynda kólik ınfraqurylymyn keshendi damytý, kólik júktemesin azaıtý jáne halyqtyń utqyrlyǵyn arttyrý kózdelgen. Negizgi ózgerister radıaldy jáne magıstraldyq joldardy damytý, kóshelerdi uzartý, kólik toraptaryn salý, sondaı-aq metro, SkyTrain jáne LRT jelilerin qosa alǵanda, qoǵamdyq kólikti damytý baǵyttaryn qamtıdy.

LRT jelisi

2026 jyldyń sáýir aıynan bastap Almatyda jeńil relsti kólik — LRT jelisiniń qurylysy jumystary júrip jatyr.

Jol ınfraqurylymyn damytý basqarmasynyń basshysy jańa qoǵamdyq kólik qurylysy bekitilgen kestege sáıkes júrgizilip jatqanyn atap ótti. Aıtýynsha, bastapqy kezeńde jer jumystary jáne transheıalardy qazý jumystary oryndaldy. Odan keıingi kezeńde jerasty ınjenerlik jelilerin aýystyrý, qaıta jańartý jáne kúsheıtý, onyń ishinde gılzalaý jáne qorǵanysh fýtlıarlarǵa salý jumystary bastalǵan. Bul jumystar tolyq aıaqtalǵan ýchaskelerde joldyń joǵarǵy qurylysy elementterin ornatý, atap aıtqanda: shpaldar men relsterdi tóseý jumystary atqarylýda.

Halyqtyq qurylys: Almatydaǵy LRT jáne SkyTrain jobalary jaıly ne belgili
Foto: Dosbol Atajan\Kazinform

Odan bólek ol negizgi jelilermen qatar LRT deposynyń qurylysy júrgizilip jatqanyn aıtty.

— LRT deposy Almaty qalasynyń Alataý aýdanyndaǵy ındýstrııalyq aımaqta ornalasady. Onyń jalpy aýdany — 19 gektar. Qazirgi ýaqytta depo aýmaǵynda jer jumystary júrgizilip jatyr, — dedi Oljas Shabdanov.

Buǵan deıin Almatyda LRT deposynyń bolashaq beınesi kórsetilgen bolatyn.

Halyqtyq qurylys: Almatydaǵy LRT jáne SkyTrain jobalary jaıly ne belgili
Foto: instagram.com/ almatydc.kz

Vedomstvo basshysy jeńil relsti kóliktiń aıaldamalary týraly da túsinik berdi. Aıtýynsha, LRT aıaldamalary joldyń ortasynda araldyq platformalar túrinde ornalasady. Jobaǵa sáıkes, 24 araldyq platforma qarastyrylǵan. ıAǵnı eki baǵyt boıynsha jalpy sany 47–48 aıaldama kesheni bolady.

Al LRT poıyzdaryn Almatyǵa jetkizý 2027 jyldyń ekinshi jartysynda bastalýy tıis.

Halyqtyq qurylys: Almatydaǵy LRT jáne SkyTrain jobalary jaıly ne belgili
Foto: Kazinform

— Jyljymaly quramdardy jetkizý 2027 jyldyń jazynan bastap josparlanyp otyr. Jobanyń birinshi kezeginde bes sektsııaly 25 quramdy jetkizý kózdelgen, — dedi basqarma basshysy.

SkyTrain jobasy

Bıyl qazan aıynda Almatynyń birneshe kóshesinde SkyTrain jobasy aıasynda jobalyq qujattamany ázirleýge qajetti ınjenerlik-geologııalyq izdestirý jumystary júrgizilip jatyr.

Kazinform tilshisine bergen jaýabynda Oljas Shabdanov Almatyda qurylysy talqylanyp jatqan SkyTrain jobasynyń mańyzyna toqtaldy. Onyń aıtýynsha, SkyTrain — estakada boıymen qozǵalatyn monorelsti kólik júıesi. Onyń dástúrli temirjol kóliginen aıyrmashylyǵy — jyljymaly quramy relstermen emes, arnaıy beton joldyń boıymen rezeńke dóńgelekter arqyly qozǵalady.

Almatydaǵy LRT jáne SkyTrain jobalary jaıly ne belgili
Foto: surrey.ca

— Bul — jerústi kólik aǵyndarymen qıylyspaı, estakada boıymen qatynaıtyn zamanaýı ári jyldam qoǵamdyq kólik túri. Mundaı kólik júıeleri álemniń kóptegen elderinde sátti paıdalanylyp keledi. Sondaı-aq jobany iske asyrý kezinde onyń bolashaqta Almaty oblysy baǵytynda uzartý jáne qalaishilik kólik jelisimen biriktirý múmkindikterin de eskerý mańyzdy, — dedi ol.

LRT Almaty
Foto: Kazinform

Oljas Shabdanov atalǵan joba 2027-2030 jyldar arasynda iske asyrylatynyn atap ótti. Jospar boıynsha SkyTrain-niń eki jelisi bolady.

  • Birinshi jeliniń uzyndyǵy — 22,5 shaqyrym. Raıymbek dańǵylymen Barlyq kólik torabynan (burynǵy bazar) Talǵar tasjolyna deıin sozylady. Onyń boıynda 13 aıaldama salynady.
  • Ekinshi jeliniń uzyndyǵy — 23,9 shaqyrym. Saın kóshesinen Ál-farabı dańǵyly, ári qaraı Shyǵys aınalma jolyna deıin sozylady jáne Halyq arenaǵa deıin jetedi.
LRT Almaty
Foto: Kazinform

Suhbat qorytyndysynda vedomstvo basshysy LRT jáne SkyTrain jobalaryn iske asyrýǵa tıisti tájirıbesi men qajetti quzyretteri bar sheteldik kompanııalar tartylǵanyn atap ótti. Biraq naqty kompanııalardyń atyn atamady.

Eske salaıyq, buǵan deıin Almatyda LRT jelisin kim salatynyn jáne qansha qarajat bólingenin jazǵanbyz.