Halyqtyq Konstıtýtsııa úshin koalıtsııasynyń saıty iske qosyldy

ASTANA. KAZINFORM – «Ádiletti jáne Progressıvti Qazaqstannyń Halyqtyq Konstıtýtsııasyn qoldaý» jalpyulttyq koalıtsııasynyń resmı saıty aldaǵy referendýmǵa jáne Jańa Konstıtýtsııa jobasyna arnalǵan. Resýrs qazaqstandyqtarǵa usynylyp otyrǵan ózgeristerdiń mazmunymen tanysýǵa múmkindik beretin túsinikti ári qoljetimdi aqparat alańy retinde ázirlendi. 

referendum2026.kz saıtynda Negizgi zań jobasynyń tolyq mátini jarııalandy. Sonymen qatar munda ózekti materıaldar, sarapshylardyń pikirleri jáne Koalıtsııanyń óńirlerdegi jumysyna qatysty jańalyqtar turaqty túrde jarııalanyp otyrady.

Platformanyń qurylymy paıdalanýshylarǵa ondaǵy málimetterdi ońaı baǵdarlap, aldaǵy daýys berýge qatysty suraqtaryna jaýap tabýǵa yńǵaıly etip jasalǵan.

Aqparatty qabyldaýdyń qolaılylyǵyna aıryqsha kóńil bólinip, erekshe qajettilikteri bar azamattarǵa arnalǵan beıimdelgen nusqa jáne bet parametrlerin óz qalaýynsha ózgertý múmkindigi qarastyrylǵan.

Túsindirý materıaldarynan bólek, saıtta Konstıtýtsııanyń máni men onyń qoǵam ómirindegi rólin tereńirek uǵynýǵa kómektesetin taqyryptyq materıaldar, vıdeokontent jáne ınteraktıvti formattar usynylǵan.

Saıt usynylyp otyrǵan reformalardyń mánin jan-jaqty túsinip, sanaly sheshim qabyldaǵysy keletin barlyq azamatqa senimdi ári tekserilgen aqparatqa qol jetkizýge múmkindik beredi.

Bul resýrstyń iske qosylýy «Ádiletti jáne Progressıvti Qazaqstannyń Halyqtyq Konstıtýtsııasy úshin» jalpyulttyq koalıtsııasynyń júıeli jumysynyń jalǵasy boldy. Onyń quramyna jetekshi saıası partııalardyń ókilderi men júzdegen qoǵamdyq uıymdar kirdi. Birlestiktiń jumysy qazirdiń ózinde elimizdiń barlyq óńirinde qyzý júrip jatyr. Ol Jańa Konstıtýtsııa jobasynyń negizgi qaǵıdalaryn túsindirýge jáne qoǵamnyń bul iske belsendi aralasýyna baǵyttalǵan kezdesýler men ashyq dıalog alańdary arqyly júzege asyrylyp jatyr.

Eske sala keteıik, buǵan deıin Astanada referendýmdy qoldaýǵa baǵyttalǵan jastar kontsertine 10 myńnan astam kelgenin jazǵanbyz.