Mańǵystaýda munaı kompanııalary bos jumys oryndaryn jasyrǵany úshin jaýapqa tartylýy múmkin
AQTAÝ. KAZINFORM — Mańǵystaýda munaı-gaz salasy boıynsha otyzǵa jýyq kompanııa bos jumys oryndary týraly habarlamaǵany belgili boldy.
Oblystyq prokýratýra bos jumys oryndaryn bólý jáne olardy aqparattyq portalda jarııalaýǵa qatysty zańnama talaptarynyń saqtalýyna taldaý júrgizý barysynda jumys berýshilerdiń talap buzǵan birneshe jaǵdaıyn anyqtady.
Sońǵy 2 jyl ishindegi tekserýler men taldaýlardyń nátıjesi boıynsha munaı-gaz salasynyń kóptegen kompanııalarynda bos jumys oryndary týraly derekti habarlamaýdyń myńnan astam oqıǵasy belgili bolyp otyr.
«Prokýratýra organdary osy derekter boıynsha „nemquraıly jumys berýshilerdi“ ákimshilik jaýapkershilikke tartý týraly qadaǵalaý aktilerin engizdi. Ákimshilik buzýshylyqtar týraly Kodekstiń 98-babyna sáıkes bos jumys oryndarynyń bolýy týraly málimetterdi halyqty jumyspen qamtý ortalyǵyna jibermeý, ýaqytynda joldamaý ákimshilik jaýapkershilikke tartylady. Budan bólek, jumys berýshiler eńbek sharttary týraly málimetterdi biryńǵaı esepke alý júıesine engizý jónindegi mindetterdi tolyq kólemde oryndamaıdy», — dedi oblystyq prokýratýra ókilderi.
Osy oraıda óńir prokýratýrasy barlyq jumys berýshilerdi menshik nysanyna qaramastan zańnama talaptaryn múltiksiz saqtaýǵa jáne azamattardyń quqyqtarynyń buzylýyna jol bermeýge shaqyryp otyr.
