Halyqty jumyspen qamtý baǵytynda aýdan jáne qala ákimderiniń KPI júıesi engiziledi
ASTANA. KAZINFORM — Búgin Úkimet otyrysynda Premer-mınıstr Oljas Bektenov eńbek naryǵyna qatysty mınıstrlikterge birqatar tapsyrma júktedi.
— Jalpy, ortalyq memlekettik organdardyń, óńir ákimdikteri men bıznestiń ózara úılesimdi, birlesken jumysy qajet. Osyǵan baılanysty mynadaı tapsyrmalar beremin. Birinshiden, Eńbek mınıstrligi oblys ákimderimen birlesip, óńirlik jumyspen qamtý kartalarynda kózdelgen eńbek naryǵynyń negizgi kórsetkishteriniń oryndalýyn qamtamasyz etýge tıis. Óńir ákimderi turaqty jumys oryndaryn qurýǵa basa nazar aýdara otyryp, jumyspen qamtý josparlarynyń oryndalýyn jeke baqylaýǵa alsyn, — dedi Oljas Bektenov.
Sonymen qatar ol Ulttyq ekonomıka mınıstrligi salalyq memlekettik organdarmen jáne óńir ákimdikterimen birlesip, osy jyldyń 1 qyrkúıegine deıin 2025-2027 jyldary iske asyrylatyn jobalar boıynsha barlyq derekti memlekettik josparlaýdyń aqparattyq júıesinde ornalastyrýdy qamtamasyz etýin tapsyrdy.
— Sondaı-aq kelesi jyldyń basynan bastap halyqty jumyspen qamtýdy keńeıtýge baǵyttalǵan aýdan jáne qala ákimderiniń KPI júıesin engizý qajet. Budan bólek, Tsıfrlyq damý mınıstrligi jyl sońyna deıin memlekettik organdar men bıznestiń derekterin biriktirip, jańa jumys oryndaryn qurý boıynsha biryńǵaı tsıfrlyq júıeni qalyptastyrýǵa tıis, — dedi Úkimet basshysy.
Budan buryn habarlanǵandaı, sýbsıdııalanatyn jumys oryndaryn iske asyrý tártibine ózgeris engizilip jatyr.