Halyqty sý tasqynynan qorǵaıtyn jol kartalary nege oryndalmady

ASTANA. KAZINFORM – QR Tótenshe jaǵdaılar mınıstri Shyńǵys Árinov sý tasqynynyń aldyn alý sharalary tolyq nátıje bermegenin synǵa aldy. Basty sebepterdiń biri retinde tıisti qarjylandyrýdyń bolmaýy aıtyldy.

«Eldi mekenderde ýaqytsha bógender salý jáne úıemeleý, aryqtardy, kanaldardy, avto jáne temir joldardaǵy sý ótkizý qurylystaryn tazartý naqty júzege asyryldy. Eldi mekenderden 10,5 mıllıon tekshe metrden astam qar shyǵaryldy. Biraq, jyl saıynǵy tájirıbe kórsetkendeı bul jetkiliksiz», - dedi mınıstr Úkimettiń búgingi otyrysynda. 

Sońǵy úsh jyldaǵy statıstıkaǵa sáıkes, qabyldanǵan aldyn alý sharalaryna qaramastan, jyl saıyn Aqmola, Qostanaı, Pavlodar, Batys Qazaqstan, Soltústik Qazaqstan jáne Shyǵys Qazaqstan oblystarynyń eldi mekenderin sý basýda.

«2017 jyldan bastap ár úsh jyl saıyn jol kartalary bekitildi. Olardy iske asyrý ishinara tıimdiligin kórsetti. Olardyń oryndalýyn taldaý is-sharalardyń kóp bóligi oryndalmaǵanyn jáne kelesi jol kartasyna aýystyrylǵanyn kórsetti. Munyń sebebi – barlyq kózdelgen sharalardy tıisti qarjylandyrýdyń bolmaýy. Jekelegen is-sharalar tek jergilikti oryndarda kúsheıtildi», - dedi mınıstr. 

Nátıjesinde, sońǵy jol kartasy tek 58%-ke iske asyrylǵan jáne 92 is-shara oryndalmaǵan.

«Keıde jobalardyń qymbattaýyna baılanysty jekelegen is-sharalardy iske asyrý úshin qarjy qarajaty jetkiliksiz boldy. Olardy qosymsha qarjylandyrýǵa kóp ýaqyt ketedi. Osyǵan baılanysty jergilikti deńgeıde ákimdikterdiń tıisti quzyreti men tetigi bar sý tasqynyna qarsy is-sharalardy 100% qarjylandyrýdy josparlaý qajet», - dedi TJ mınıstri. 

Buǵan deıin Shyńǵys Árinov kóktemde elimizdiń 10 óńirinde sý tasqyny qaýpi boljanyp otyrǵanyn aıtqan edi.