Halyqty sapaly jáne qoljetimdi medıtsınalyq kómekpen qamtamasyz etý máselesi talqylandy

ASTANA. KAZINFORM - Senattyń Áleýmettik-mádenı damý jáne ǵylym komıtetiniń depýtattary keńeıtilgen otyrysta «Qazaqstan Respýblıkasynyń keıbir zańnamalyq aktilerine densaýlyq saqtaý máseleleri boıynsha ózgerister men tolyqtyrýlar engizý týraly» zańdy talqylady.

Qujat halyqtyń sapaly medıtsınalyq kómekke qol jetkizýdi jaqsartýǵa, patsıent quqyqtaryn qorǵaýdy kúsheıtýge, sondaı-aq medıtsına qyzmetkeriniń bedelin arttyrýǵa kómektesedi. Zań medıtsına qyzmetkeriniń kásibı jaýapkershiligin saqtandyrý júıesin engizýge, medıtsına jáne farmatsevtıka qyzmetkerlerine áleýmettik kepildik belgileýge, medıtsına mamandyǵynyń mártebesi men tartymdylyǵyn arttyrýǵa baǵyttalǵan.

Senatorlardyń aıtýynsha, zańnyń qabyldanýy medıtsına qyzmetkerine kásibı qaýipti azaıtýǵa, medıtsınalyq qyzmet alý kezinde azamattar quqyqtaryn qorǵaý, sondaı-aq medıtsınalyq kómek kórsetý sapasyn arttyrýǵa yqpal etetin bolady.

Senat komıtetiniń músheleri talqylaý qorytyndysy boıynsha zańdy Palata otyrysynda qaraýǵa jiberý týraly sheshim qabyldady.