Halyqty destrýktıvti aǵymdardan memleket qana qorǵaıdy – Depýtat

Parlament Senatynyń depýtaty, Áleýmettik-mádenı damý jáne ǵylym komıtetiniń tóraǵasy Nurtóre Júsip dinı aǵymdardan qorǵaıtyn zańdy jetildirý týraly pikir bildirdi, dep habarlaıdy Kazinform. 

«Qazaqtyń dástúrli ata dini bar, 20 mln halqymyz bolsa, sonyń ishinde ıslam dinin ustanatyn 14 mln halyq mólsherin anyqtaýǵa bolady. Ata zań boıynsha zaıyrly qoǵam eseptelemiz. Dástúrli emes, destrýktıvti túrli aǵymdar ózderiniń kózqarasyn qoǵamǵa, azamattarǵa tańý úderisi kúsheıdi. «Nege basyńa mynany kımeısiń?» bolmasa «Nege bylaı júrmeısiń» degen nárse kóbeıip ketti. Sholaq balaq, qaba saqaldylardyń kóbeıip ketkenin halyq kórip otyr. Halyqty, ásirese jas urpaqty ondaı destrýktıvti aǵymdardyń jeteginde ketýden qorǵaıtyn memleket qana. Memleket óziniń zańymen qorǵaýy kerek. Sondyqtan dinge qatysty zańnamalardy jetildirý máselesi óte ózekti dep esepteımin», - dedi N.Júsip Jibek joly telearnasyndaǵy Ýáde» baǵdarlamasynda.

Depýtat dinı saýatqa kóp nárse baılanysty ekenin basa aıtty.

«Bizdi endi nadandyqqa ıtermelep, orta ǵasyrǵa qaıtadan alyp kelýge umtylýshylyqty óz basym quptamaımyn jáne qoldamaımyn. Qazir ǵasyr bólek, Prezıdenttiń aıtyp otyrǵany qaıda, biz qaıdamyz? Básekelestik, ózińiz aıtqan ult bolmysy máselelerinde kózi qaraqty, kókiregi oıaý qazaq bolmasa, túrli aǵymnyń jeteginde ketedi», - dedi Senator.

Buǵan deıin Nurtóre Júsip jýrnalısterdiń esh sanatqa jatpaıtynyn, olardy qorǵaıtyn mehanızm keregin aıtqan edi.