Halyqty aýyzsýmen 100% qamtý jospary qalaı júrgizilip jatyr
ASTANA. KAZINFORM — Prezıdenttiń jyl sońyna deıin halyqty aýyzsýmen 100% qamtamasyz etý týraly tapsyrmasy muqııat baqylanyp otyr. Bul týraly Ónerkásip jáne qurylys vıtse-mınıstri Qýandyq Qajkenov eseptik kezdesýde aıtyp berdi.
Vıtse-mınıstr 90 qalanyń 73-i ortalyqtandyrylǵan sýmen jabdyqtalǵanyn, al qalǵan 17-si 2025 jyldyń sońyna deıin qamtamasyz etiletinin atap ótti.
— 6 148 aýyldyń 5 685-i sýmen qamtamasyz etilgen, qalǵan 463 aýyl jospar boıynsha qosylady, al 255 aýylǵa ortalyqtandyrylǵan sýmen jabdyqtaý jobalary josparlanyp otyr. Qalalar men aýyldardaǵy sýmen jabdyqtaý jáne sý burý júıesin damytý jobalaryna respýblıkalyq bıýdjetten 241 mlrd teńge bólindi, — dedi Qýandyq Qajkenov elordada Kongress ortalyqta.
Ótken jyly Prezıdent joldaýy aıasynda Energetıka jáne kommýnaldyq sharýashylyq salalaryn jańǵyrtýdyń ulttyq jobasy maquldandy. Ulttyq jobanyń negizgi maqsattarynyń biri — shamamen 13 trıllıon teńge ınvestıtsııa tartý arqyly el boıynsha jeliniń tozýyn 40%-ǵa tómendetý.
— Mınıstrlik jalpy quny 1 trıllıon teńge bolatyn shamamen 8 myń shaqyrym sýmen jabdyqtaý jáne káriz jelilerin jańǵyrtýdy jáne 0,8 trıllıon teńge bolatyn 45 káriz-tazartý qurylysy jobasyn josparlap otyr, — dedi Qýandyq Qajkenov.
Qazirgi ýaqytta Atyraý, Aqtaý, Qarqaraly, Leńgir, Qarajal jáne Qyzylorda qalalarynda káriz-tazartý qurylysy jobalaryn qaıta qurý jáne qurylys jumystary istelip jatyr.
Aqtaý men Leńgirdegi káriz-tazartý qurylysy jobalaryn osy jyldyń sońyna deıin aıaqtaý josparlanǵan. Al Atyraý, Qyzylorda jáne Shymkent qalalarynda káriz-tazartý qurylystary 2026 jyly paıdalanýǵa beriledi.
Aıta keteıik, SQO-daǵy Birlik aýylyna qaıtarylǵan aktıvter esebinen aýyzsý tartyldy.